Russia in Ukraine bei na zual
Russia chuan missile leh drone-a nasa taka a beih vangin Ukraine a power plant lian ber pakhat chu tichhiain a dang te pawh a tichhe nual bawk niin official te chuan an sawi a. Russia chuan energy infrastructure te thlurbingin hma a la leh ta a ni.
Kyiv, Cherkasy leh Zhytomyr region te energy supply tu ber Trypilska plant chu tum tam tak beiha a awm avangin transformer, turbines leh generator te tichhiain a kang bawk a ni.
Drone hmasa berin a den hnuah workers te chuan mahni sahimna zawngin an tlanchhia tiin Andrii Gota, he plant enkawltu Centrenergo chairman chuan sawi.
Plant alh lai chu an thlir tlawk tlawk ringawt mai tiin a sawi bawk a. Gota chuan darkar tam fe liam hnuah senghawi hna kalpui theih chauh a ni a ti bawk.
Russian President Vladimir Putin chuan Moscow khawpuiah Ukrainian energy facility an beihna chhan chu ukrainian tena Russian oil refineries an beih phuba lakna a ni tiin a sawi.
Trypilska plant hian 3 million customer te hnenah electricity a pe a, mahse, tumah power ngheiin an awm phah chuang lo va, a chhan chu grid dangin an chhawmdawl thei a, tun ang hun chu power demand hniam lai a nih bawk vang a ni. Mahse, plant tihchhiat chuan thla lo kal zel turah nipui tak tak thlen huna air condition hman nasat ngaih hunah chuan harsatna nasa tak a siam dawn a ni.
Kharkiv, Ukraine a khawpui lian ber pahnihah pawh drone 10 velin energy infrastructure an bei tho niin Foreign Minister Dmytro Kuleba chuan a sawi a, hei vang hian mi 200,000 velin power an nghei mek a ti bawk.
Ukraine a private energy operator lian ber DTEK te chuan beihna an tawh chu kumina beihna tawh tawh zinga la turu ber an ti a. Energy Minister Herman haluschchenko chuan missile hmangin nasa takin kan energy sector te tihchhiat a ni tiin a sawi bawk.
Russia chuan tun hnaiah Ukrainian energy facility te a bei thar leh a. Russian missile te chuan a kah fuh theih em avangin Ukraine tan tihngaihna vak a awm lo. Ukraine leader te chuan air defence system tha zawk khawthlang ram te hnenah an ngen a, mahse, duh anga rangin engmah an dawng thei si lo a ni.