Russia-in Ukraine ram lak belh zel, region pariat lut tawh

Russia-in Ukraine ram lak belh zel, region pariat lut tawh
Russia chuan ram zauh zelin Ukraine-a region pariat an dai lut ta tih Ukrainian sipaihotuin Nilaini khan a sawi a. Kum thum chuang indona awm tawhah hian US kaihhruaia remna a awm theih nana hmalaknain awmzia a la neih theih loh karah Kyiv pawhin ram lak let tumin a bei ve mek zel.
Russian sipai thenkhat chuan khawchhak lama Donetsk region dawt chiaha industry tamna, Dnipropetrovsk region-a Novoheorhiivka and Zaporizke khua an lut tih indona hmuna awm sipai thupuangtu, Victor Trehubov-a chuan The Associated Press a hrilh.
Russian defense ministry chuan thla tirah khan khaw pahnih hi an la tih a lo sawi tawh nghe nghe a; mahse, Russian-te hi an la inkulh nghet lo va, khaw hnihah hian inbeihna a la awm reng tih Trehubov-a chuan a sawi.
Ukrainian sipaite hian Russia sipai tam tham tak dan tumin an bei let nasa hle a. Sipai lam hre chiangte chuan Ukrainian invenna hi a chhe ta tihna a nih loh thu leh Russian sipaite hian khaw lian leh khawpuite an la zung zung thei dawn chuang lo niin an sawi a, thingtlang lamah phei chuan Ukraine an la tal na hle niin an sawi.
Ukraine khawchhak leh chhimchhak, Russia nena an inrina km 1,000 vela thuiah chuan indonaah hian sipai sang tel ve ve an thi tawh a. Russian sipaite hian Sumy, Kharkiv, Luhansk, Donetsk, Zaporizhzhia, Kherson leh Mykolaiv region-te an lut tawh a ni.
Russia hian March, 2014 khan Ukraine lak atangin Crimean Peninsula a lo luah tawh bawk a, tunah hian Ukraine ram hmun ngaa thena hmun khata zau an luah tawh a ni.
Khawthlang ram hruaitute chuan Russian President Vladimir Putin-a chu muanna lam hawia ke pen duh lovah an puh mek.
US President Donald Trump-a chuan Thawhlehni kal ta khan Putin-a leh Ukraine President Volodymyr Zelenskyy-a hmaichhana an inbiak a rawt a. Zirtawpni khan chawlhkar hnih chhunga inbiakna a awm loh chuan hma lak leh dan tur ngaihtuah a ni ang tih a sawi leh.
Ukraine chuan US rawtnaa Putin nena inbiak leh inkahhai hi a pawm.
Russia hian US leh khawthlang ramten indo zawh nakin zela Moscow-in Ukraine a rûn lehna tur ven nana an himna siamsak tur a rawt chu a pawm ve thei lo thung.
Khawthlang ram thuneituten Ukraine himna tura ruahmanna an siamah hian an sipaite Ukraine-a dah pawh a tel a; mahse, Kremlin thupuangtu, Dmitry Peskov-a chuan NATO ramten sipai an dah tur hi Moscow tan pawm chi a ni lo tih a sawi bawk.
Ukraine hian Russia che chak lutuk dan nan drone-in a bei nasa a. Region thenkhatah chuan gas station-ah pawh engmah chhek an nei tawh lo va, tuialhthei thlitfimna leh tuialhthei sawngbawlna hmunte pawh tun hnaiah an tihchhiatsak nasa hle.
Russia pawhin thlasik lo thlen hmain Ukraine-a energy inpekna tihchhiat tumin power grid an tihchhiatsak nasa hle bawk.
Ukraine-a energy ministry chuan Nilaini khan region paruka Russia-a energy leh gas hmunte an bei leh tih a puang.