Russia leh Ukraine ten mi tang an inthleng tan

Russia leh Ukraine ten mi tang an inthleng tan
Turkey-a kar hmasaa Russia leh Ukraine aiawhte inbiaknaa rem an tih tawh angin mi tang kum 25 hnuai lam inthleng leh sipai thi 12,000 ruang inthleng an kalpui tan.
Ukrainian President Volodymyr Zelensky-a chuan mi tang inthleng hi ‘a tahtawlin’ kalpui tur a nih thu leh ni eng emaw zat awh tur a nih thu a sawi.
Telegram-ah, “Ruahmanna fel tak siam niin thenkhat chu a chipchiar hle a, ni tin inbiak zui zel a ni bawk,” a ti.
Russian defence ministry pawhin ‘Russian sipai kum 25 hnuai lamte chu Kyiv-in a awp ram atangin a thawh khat nan hruai haw an ni dawn’ tih a sawi a, ‘hetiang zat bawk hi’ Ukraine-ah an kir dawn niin as awi a. Ram pahnihte hian mi engzat nge an inthleng dawn an sawi lo ve ve.
A hmaa an lo inthleng tawhah Moscow hian Russian sipaite chu Belarus-ah rilru leh taksa lamah damdawia enkawl hmasak an nih thu a sawi.
Kyiv-a thuneitute chuan Thawhtannia Ukrainian mi tang haw thenkhat chu indona a chhuah tirha Russian-te man kha an ni tih an sawi.
Ukrainian sipai chin hriat lohva awm chhungte tam tak chu mi tang an inthlengna hmun, Belarus nena an inrinaah Thawhtanni atang khan an pung khawm.
Indonaa an man mi tang inthleng turte hi bus-a phurh thlen an nih rualin an tlan khawm nghal a, thenkhat chuan an chhungte thlalakte pawh an keng lang.
Kar hmasaah khan Moscow leh Kyiv hi sipai thite ruang lak kir dan tur tikhawlhkhamah an inpuh tawn.
Russia chuan Ukrainian sipai ruang 1,000 chuang hlan turin an inhlanna hmunah an phur thleng a, Ukrainian thuneitute an lo thleng ve lo niin an sawi a. Ukraine hian Moscow chu ‘game bawlhhlawh tak khelah’ puh letin Russia chu an inthleng tura an inremna anga kal lovah a puh.
May thla tawpah khan Russia leh Ukraine hian kum 2022-a Russia-in a rûn hnua mi tang an inthleng tam ber tum siamin sipai leh civil mi 390 chuang an lo inthleng tawh.
Mi tang an inthleng mek lai hian Pathianni zan zankhua khan indona an kalpui reng a. Moscow chuan drone 479 thlawh chhuahtirin Ukraine khawthlang lama Rivne region chu an bitum nasat a ni.
Russia-a defence ministry chuan an tum ber chu Rivne-a Dubno base a nih thu leh Ukraine-in June 1-a Russian airfield-te drone hmanga a beih chiam ‘chhan letna pakhat’ a nih thu a sawi.
Pathianni zana Russian-te beihnaah hian Ukrainian region eng emaw zatah chhiatna thlen mah se thi an awm hriat a ni lo.
Russia hian tun hnaiah Ukraine a bei na tial tial a, kar tin drone a thlawh luhtir tam lam record thar a siam ziah.
Hetih lai hian Kyiv pawhin Ukrainian ramri atanga mek 400 vela hla, Nizhny Novgorod region-a Russian airbase an bei leh tih an sawi ve bawk.
Ukraine hian he base-ah hian hypersonic missile kah chhuahna thlawhnate a awm nia sawiin ‘hmelma thlawhna unit hnih’ an tihchhiat thu an sawi a. Guide drone leh aerial bomb siamna electronics factory pawh an bei tih an sawi bawk.