Russia lirnghing vangin tsunami inralrinna tichhuak

Russia lirnghing vangin tsunami inralrinna tichhuak
Russia khawchhak kil tuipui kama magnitude 8.8-a naa Nilaini tuka lirnghing avangin tsunami insiam thei avangin Japan, Hawaii leh US khawthlang tuipui kamah inralrinna tihchhuah a ni a; mahse, chhiatna lian thleng thei a awm zui loh avangin hmun tam takah tihtawp leh tawh a ni.
Lirnghing hian Russia-a Kamchatka Peninsula bul chu chawhma dar 11:25 (India-a zing dar 04:55) khan sawiin chhinchhiah tawh china a na ber pawl a tling.
Mi eng emaw zat inhliam an awm a; mahse, thi an awm erawh hriat a la ni lo.
Pacific bawra mi maktaduai hnih chuang chu insaseng tura tih nghal an ni a; mahse, tsunami warning tam zawk chu tihhniam leh tawh a ni.
Inralrinna hi China, Philippines, Indonesia, New Zealand leh a aia hla, Peru, Chile leh Mexico-ah pawh khawn a ni.
A tira hlauhthawn ang aiin tsunami insiam hi a nasa ta lo va. Video thehdarhah chuan tui fawn sang tak takin Severo-Kurilsk, Russia-a inte chu a khuh hlawm a. Thuneitute chuan tuipui kam leh sangha manna hmunah chuan metre 4-a sang niin an sawi a, lawnglengte pawh a len nasa hle a. Power grid pawh Russia-a Sakhalin region-ah chuan a chhia.
Russia hian Sakhalin leh Kamchatka-a tsunami warning a tihchhuah chu a sut leh nghal.
Japan-ah chuan mi maktaduai 1.9 chuang insaseng tura tiin mi chengte chu hmun sanga kal turin an ti a. Weather agency chuan a hnuah tsunami warning hi a tihniam leh thung.
Hawaii-ah chuan a tirah thuneituten tuifawn hi feet 10-a sang ni thei turin an sawi a; mahse, tsunami warning hi thliarkarah hian tihhniam leh tawh a ni tih Pacific Tsunami Warning Center chuan a sawi.
Inralrinna tihniam mah se tui fawn chak tak, tui lian tenau leh tui chak tak a awm thei a, tsunami lian erawh chuan a nuai dawn lo niin an sawi a. Insasengte pawh an kir leh tawh niin Hawaii Emergency Management Agency-a an director chuan a sawi.
An hlauhthawn ber thleng thei nia an ngaih chu thleng lo mah se ram tam taka thuneitute chuan mipuite chu inralring reng turin an chah hlawm.
Lir hi India huna Nilaini zing dar 4:55-a nghing niin tsunami fawn na vak lo chuan North America khawthlang vaukamte chu chhun dar 12.20 (India-a tlai dar 03.40) velah a thleng.
US Geological Survey chuan lirnghing hi lei hnuai km 20.7-a thukah, Petropavlovsk-Kamchatsky chhak, chhimchhak km 119 atanga intan niin an sawi.
A tirah magnitude 8.0 tiin sawi mah se a hnuah an tisang leh a, nghing nawn pawh a thleng nual.
Chhinchhiah chinah lirnghing na ber parukna niin kum 2010-a Biobío, Chile leh kum 1906-a Esmeraldas, Ecuador-a thleng nen a nat zawng a inang.
A na pangana chu kum 1952-a Kamchatka Krai, Russia-a thleng kha niin ‘khawvela magnitude 9 tling chhinchhiah hmasak ber’ tih a ni.
Kum 2004-a Indian Ocean lirnghing leh tsunami thawk avanga mi 2,27,000 chuang thihna kha magnitude 9.2-9.3 a ni.
Indonesia-a mihring cheng an tam em emna, Sumatra khawthlang vaukam atanga tuipui km 160 vela hla atanga intan a ni a. Tun tuma a nghinna, Russia-a Kamchatka Peninsula erawh cheng an tlem em emna a ni ve thung.