Russia SC-in firfiak pawl atangin Taliban paih

Russia SC-in firfiak pawl atangin Taliban paih
Russia-a Supreme Court chuan Taliban an khap (ban)-a kum 20 chuang zet ‘firfiak pawl’ tia a chhiarna chu a paih (suspend) a. Afghanistan-a rorel mektute nen hian an inzawm hret hret zel.
Ningani thutlukna hi prosecutor general-in a ngen angin hman nghal tur a nih thu Judge Oleg Nefedov chuan a puang tih Russia-a Tass news agency chuan a tar lang.
Kum 2021 atanga Afghanistan-a thuneihna chelh lehtu pawl hi kum 1990 chhova Afghan Civil War laia nasa taka an inep hnuah Moscow nen an inhnaih leh hret hret zel a ni.
Tun hnaiah venhimna lama an ngaih dante an inhrilh tawn a. Heng zingah hian ISIL (ISIS) hnuaia pawl pakhat, ISKP beih dan tur pawh telin hei hian Russia leh Taliban hi a pawt hnai lehzual a ni.
Nikum khan President Vladimir Putin-a chuan Taliban chu firfiak dona kawnga ‘an thawhpui’ tia sawiin Kabul-a an palai pawhin firfiak pawl an tih atanga paih an tum tih a sawi.
Tun hnaia Taliban mi pawimawhte vawi tam tak lo mikhualtu, Moscow hian Afghanistan hi Asia chhimchhaka boruakalhthei thawn chhuahna kawng atan hman a duh a ni.
“Moscow hian politics, sumdawnna leh economic-a Kabul nena inkungkaih zel a duh a ni,” tiin Russia-a Foreign Minister Sergey Lavrov chuan October khan a sawi.
Asian ram dangte pawhin tun hnaiah Taliban hi an hnimhnai hret hret a, sorkar tak takah erawh an la pawm hlawm lo vek thung.
Kum 2023 khan hmeichhiate zirna leh an chet velna nasa taka khuahkhirhtu pawl hi ‘firfiak pawl’ list an siam atangin a lo paih tawh a. Nikum khan Kyrgyzstan-in a ti veleh bawk.
China, India, Saudi Arabia, United Arab Emirates, Qatar leh Iran te pawhin Kabul-ah hian embassy an nei hlawm a. Beijing phei chuan kum 2023 khan ambassador dahin Taliban-in Afghanistan-a rorel hnuah dah hmasa ber an ni.