Russian sipai nunna chan 20,000 chuang ti

Nikum December thla aTang khan Ukraine indonaah Russian sipai 20,000 chuangin nunna an chan tawh tiin US chuan a sawi.
Sipai 80,000 velin hliam an tuar bawk tiin National Security Coucil thupuangtu John Kirby chuan a sawi bawk.
Nunna chan zahve lawih te hi Bakhmut city nasa taka lak tuma beitu Wagner mercenary company mi leh sa te tia sawi ani bawk a.
Russia cuan nikum aTang khan he khawpi lian lo tak hi lak tumin a bei nasa a ni. Moscow chuan Bakhmut hmun tam zawk a thunu mek a, mahse, Ukrainian sipai te chuan khawpui thlang lam hmun te an la thunun thung a. Bakhmut inbeihna avang hian ram pahnih ten an chan nasa hle.
Ukrainian officials te chuan Bakhmut inbeihna chu Russian sipai te a tm thei ang tihhlum nan leh an reserve te koh lo thei lova siamna remchangah an hmang an ti bawk.
“Russia in Donbas region lak tuma Bakhmut aTanga a beihna tam ber chu a hlawhchham a ni” tiin John Kirby chuan a sawi a, “Russia hian territory pawimawhna nei te lak tak tak a nei lo” tiin a sawi bawk a.
“Russia hian thi leh hliam 100,000 chuang a nei tawhah kan ngai a, chung zinga 20,000 chuang te chu nunna chan te an ni” tiin a sawi bawk.
US figure ang chuan nikum December thla aTang khan Bakhmut ah Russia in nunna chan a ngah hle a. “Russia in hmalakna a neih te avanga a sawhkhawh tawng zawkin hloh a ngah hle a ni” tiin Kirby chuan a sawi.
Ukrainian te hlohna a sawi lan ve loh chhan chhangin Kirby chuan ‘Ukraine chu a tuartu an ni a, Russia chu a bultumtu an ni zawk a’ tiin a chhang.
Russia hian Bakhmut hi la in thunun thei se chuan a tum br Donetsk region pumpui bakah eastern region dang pathum leh nikum September thlaa referendum phuahchawp hmanga a chhuhluih Crimea te chu a thunun Tha thei dawn a ni.
Analysts te chuan Bakhmut chuan startegic value a nei vak lo an ti a, mahse, Russian commander te chuan an la hleithei chuang lo an ti bawk a.
Bakhmut lak a nih theih nan hian misual rual te leh tawrawt tak takte lakhawma huikhawma sipai anga siamtu Wagner mercenary te chu hman an ni a, mahse, an beisei ang ngawtin an hlawhtling thei hauh lo.
Wagner leader Tevgeny Prigozhin chuan a private amry te chuan Bakhmut khawpui chu an la lek lek tawh tiin a sawi a, mahse, tun hnaiah Bakhmut beihna aTanga a sipai te hnuhkirah a vau leh tawh thung.
Inhnuhdawh a sawina chhanah a sipai te chu Moscow in an mamawh ralthuam a pek loh vang tiin a sawi a, Wagner fighter te chu Bakhmut aTanga lachhuakin Mali ah tirh zawk an ni thei tiin Moscow a vau bawk.
Prigozhin hi Ukraine indonaah Russian defence ministry te nen inbakaih fovin a fighter te chu official te chuan anmamawh ang ralthuam a pe Tha duh tawk lo a ti fo bawk a. Progozhin hian a hma pawhin Russia media leh military leadership te chu ‘Russian mipuite dawt hrilh tawh suh u’ tiin a sawi nghe nghe a.
“Russian mipui te dawt hrilhin, engkim a Tha vek e tih hi kan sim a gnai” tiin a sawi a. Ukrainian military te chu military operation Tha kalpui tiin a fak zawk bawk.