RV leh Phunchawnga chengte tan eizawnna kawng dappui

Zu leh dan phal loh dang thil zawrh tihtawp tuma sawrkar hmalakna pakhat atan Rangvamual leh Phunchawnga cheng, dan phal ang eizawnna ngelnghet an neih theih dan sawipuiin sawrkar department hrang hrang leh suma inpuihna pechhuak thei chi – bank leh agency dangte chuan inzirtirna leh help desk an kalpui tan.
Core Committee on Mission Chhanchhuahna (Alternative Income Generation Programme against Illicit Alcohol Manufacturing for Rangvamual and Phunchawng) atana thil tul leh ruahmanna neih sa, July 19-a Aizawl district bawrhsap hoa an lo rel tawh chu July 28 atang khan bawhzui a ni a. Rangvamual Local Council House leh Phunchawng Presbyterian Kohhran Sunday School Hall-ah inzirtirna buatsaihin Help Desk siam a ni bawk.
Veng pahnih atang hian chhungkaw aiawh mi 170 chuang an tel a. Eizawnna mumal neilo, zu zawrh leh danin a phal loh hmanga ei zawng thinte chhanchhuahna project hi tha taka kalpui tum a ni. A bul tanna atan Social Welfare department hnuaia Mizoram Social Defence And Rehabilitation Board bakah LESDE leh UD&PA department, AMC, KVIB, lead bank leh SBI-RSETI ten an scheme, loan leh service dang hmanga ei zawn theih dan, bul tan tura thil hriat ngai inhrilha hma lak a ni.
Heng department leh bank hrang hrang aiawh mi 19-in zirtirna an pe a. Inhrilhfiah ngaite hrilhfiah a nih bakah sawrkar scheme leh loan hmanga tanpui an nih theih dan tur sawipui an ni.
Mission Chhanchhuahna atan hian Core Committee leh Working Committee din a ni tawh a. Core Committee-ah hian sawrkar department bakah kohhran leh tlawmngai pawl aiawh, rilru lama harsatna enkawl thiam bikte pawh an tel a ni.