Rwanda rama trophy dawng Verstappen

Rwanda rama trophy dawng Verstappen
Karliamta Zirtawpni khan Africa khawmualpuia a vawikhatna atan Formula One champion trophy hlanna hun buatsaih niin, Rwanda khawpui Kigali-a award hlanna inkhawmah Red Bull driver chhuan tawlawl Max Verstappen chuan International Automobile Federation (FIA) president Mohammed Ben Sulayem kut atangin trophy a dawng a, a sirah hian Rwandan president Paul Kagame pawh a ding ve nghe nghe.
Tun kha Dutch driver Verstappen-a’n a zawna Formula One champion’s trophy tum li a dawnna ni tawhin, kum 1950 daih tawha championship tan a nih hnuah title pali chin dawng tling thei driver parukna chiah a ni.
Red Bull star Verstappen chuan trophy a dawn zawha thu a sawiah title pali ngawt han dawn tak mai chu mak leh awihawm loh hial zawka a hriat thu sawi chungin chu mi chin chu a tawpna a nih loh a beisei thu a tarlang tel a, hun rei tak hlawhtlinnain a la umzui zel a beisei thu sawi chungin, “Kumin hian title chuha inbeihna a chep kher mai a, nakkum lamah pawh heti leh tho hi a nih ka ring,” a ti.
Kumin constructors’ title erawh hun rei tak roreltu Red Bull kut atangin McLaren chuan an chhuhsak a, kum 26 tehreng chhunga British team-in constructors’ title an lak vawikhatna niin, he mi chungchangah hian kum 27-a upa Verstappen a tawngchhuak a, constructors’ champion ni turin kum thar lamah thawhrim lehzual an ngai dawn tih a sawi.
Dutch driver hi kumin October thla khan Singapore Grand Prix-a a chet dan mawi lo avangin hrem a ni a, kha vang khan Afrioca ramah hian naupangte kiangah motorsports grassroots development programme a hmanpui a, kha kha hremna a tawhin a ken tel a ni.
Kigali khawpuia inlan ve McLaren driver Lando Norris chuan title race-a a elpui lian Verstappen a lawmpui thu sawi chungin kum tharah pawh inbeihna hautak hmachhawn tur a awm leh ngei dawn niin a sawi.
Red Bull-a a hmalam hun chiang lo Verstappen-a Mexican team-mate Sergio Perez erawh Rwanda rama Formula One champion trophy hlanna inkhawmah hian hmuh tur a awm ve lo a; hetih mek lai hian China ramah F1 driver zinga midang lehpelh kawnga chungnung ber chawimawina Action of the Year award a dawng thung.
Brazilian F2 champion Gabriel Bortoleto chu Formula One Rookie of the Year atan thlan niin, Kigali-ah hian award a dawng a; nakkum hian Formula One-ah Sauber tan a debut season a nghakchhuak ve tawh dawn a ni.