RZ-a tan silver medal a hmin

RZ-a tan silver medal a hmin
Khatla veng pa, Saron Badminton Club tana khel mek K. Ramzauva chuan January ni 25 atanga Febuary ni 1, 2026 chhunga Agra, UP-a Yonex-Sunrise All India Masters Ranking Badminton Tournament 2026 khelh zawh tak 60+ men’s singles category-ah silver medal a vaw chhuak.
Rz-a hian seeded no 2 ni chungin tournament a hmachhawn a; round of 32 atanga bul tanin, Achimi Yekhuvi chu 21-19, 21-18-in a hneh phawt.
Round of 16 lamah Atul Walia nen intumin 27-25, 21-11 hnehna a chang nawn a; quarter-final match-ah pawh harsatna nei loin Pavalavannan B chu 21-12, 21-13-in a hneh leh.
Semi-final lamah Sandeep Vij chu 22-20, 17-21, 21-14-a hneh lehin, final-ah erawh seeded no 1, Ram Lakhan lakah 18-21, 22-20, 5-21-in vanduai zawkah a tang a, silver medal a dawng ta a ni.
Mizoram Badminton Association chuan India ram pum inelna liana Mizoram tihmingthatu K. Ramzauva hi a chhuangin a hlawhtlinnaah a lawmpui tak meuh meuh tih thuchhuah siamin an tarlang a, hei aia sang zawk hlawhtlinna chang chho zel tur leh Mizoram tihmingthatu ni chho zel turin duhsakna a hlan nghal bawk.