Sa leh thlai hrisel leh hlawk zawk neihna atana thawhho dan tur rel

Sa leh thlai hrisel leh hlawk zawk
neihna atana thawhho dan tur rel
Indian Council of Agricultural Research (ICAR) Complex for NEH Region Mizoram Centre, Kolasib chuan Mizorama loneitute leh sawrkar leh ICAR inkara thawhhona tha a awm a, chumi chuan hlawk leh hrisel zawka buh, sa thlai thar a nih theihna tura intihchak tawn dan tur sawihoin Nilaini khan Aizawlah inrawnkhawm a ni.
Hmanpuitu AH & Vety minister C Lalsawivunga chuan, agriculture leh a kaihnawih sector chu state economy innghahna bulpui a ni a, kan eizawnna ber leh kan nunphung nen thuk taka inzawm tlat a nih avangin hetiang hun buatsaih hi a tul hle tih a sawi a. African Swine Fever avanga vawk vulhtute channa chu cheng vaibelchhe 600 chuang a ni tawh, tiin, hetiangah pawh hian ICAR nen tangdun a, research nei a, a vaccine siamchhuak tura chak zawka hma lak te a tul takzet tih a sawi a ni.
Kan ram tualto thlai, thei leh ran vulh venhim leh tihpun, kan leilung leh sik leh sa mil tur thlai, thei leh ran vulh tur pawnlam atanga chawkluh dan zawnchhuah kawngah leh natna hri laka kan thlai leh ran venhim kawngah tunlai thiamna thar ber ber hmanga hlawk zawk leh rang zawk thlai leh ran kan tharchhuah thei nana sawiho tam a ngai tih a sawi bawk.
Hmanpuitu dang, acting chief secretary H Lalengmawia pawhin agrilculture leh a kaihnawih department hian department mala hma lak ai chuan, tanhoa hma lak hian kawng tam takah hlawhtlinna a sang zawk tih a sawi a. Thlai, thei, sa leh sangaah state intodelh kan ni thei tih ring a, theihtawp chhuah tlan a ngai tih a sawi a ni.
Mithiam 11 thu buatsaih ngaihthlak leh sawiho a ni a. CVSc & AH CAU Selesih dean Dr Lalnuntluangi Hmar leh NABARD, Mizoram,Regional Office Aizawl general manager Pankaja Borah ten an kaihhruai a. Sawiho tur thupuiah “Strengthening Livestock & Fishery Research and Extension Services” hman a ni.