Sa talhna leh zawrhna hmun siam rel

Thenzawl khaw chhungah thianghlim zawka sa leh chawhmeh zawrh a nih dan tur ngaihtuahin Ningani khan sub divisional officer (Civil) hoin an thukhawm a. AH& Vety leh Commerce department aiawh, Thenzawl Joint VC, Thenzawl East VC, Thenzawl Kanan VC, Joint YMA, Thenzawl Sa Ser Association hruaitute leh MJA aiawhte an tel.
SDO (Civil) Thenzawl K Lalhlimpuia chuan Thenzawl khuain hma a sawn zelnan tun hun thlir mai loa kum 50 hnu lam thlir chunga ngaihtuahna seng turin khawtlang hruaitute a chah a. Thawhona tha neih a tul tih a sawi bawk.
Thenzawla thianghlim zawka sa hralhchhuah a nih theih nan tuna sa zawrhna awmsa atangin thla thar atang chuan Commerce & Industries department hnuaia Thenzawl East Market building-ah insawn tura ngen leh hriattir nise, an ti a. Thianghlim zawka sa talh a nih theih nan sa talhna hmun ‘Slaughter House’ din tura hma lak nise, an ti. Sa zawrhna bakah kawngpui dunga chawhmeh zuar thinte pawh Thenzawl East Market building-ah hian insawnlut vek tura ngen leh hriattir nise tiin, hemi kawnga hma la tur an inruat nghal a ni.
Thutkhawm zawh hian SDO(C) hoin Thenzawl East Market building an tlawh a. Slaughter House sakna hmun tura tha nia an hriat chu a hmunah an tlawh bawk.