Sabalenka kutah Madrid Open

Sabalenka kutah Madrid Open
Inrinni Madrid Open final-ah 6-3 7-6 (7-3)-a fourth seed Coco Gauff hnehin world number one Aryna Sabalenka chu a vawithumna atan Madrid Open-ah a champion; grand slam title pathum la tawh Belarusian tan tun kha kumin bika WTA tour title pathum a sualchhuahna chiah a ni nghal bawk.
Inkhel thununtu Sabalenka hian 4-1-a set khatna hma a hruaina kawngah point khat mah hloh loin game li a la zawn thawt a; US Open champion hlui Gauff beilet hian break nen tangin 4-2 rawn nih chhohpui bawk mah se Belarusian chuan break dang hmangin set hmasa ber a la zui ta tho a ni.
Set hnihnaah kum 21-a upa American Gauff a rawn tang thei ta viau nain Sabalenka zawkin tiebreak kaltlangin set a la leh a, WTA 1000 title a hlawhchhuak ta nge nge a ni.
Vawiina kum 27 tling chho ve ta Sabalenka hian Madrid Open title la ngun ber Petra Kvitova record a nihrual ve ta chiah a; Inrinni final-a a hneh tak Gauff nen khan head-to-head record-ah intluk chiah bawkin, vawi 10 an intum tawhah vawi nga ve ve an chak.
Tun kha kum 2025 chhunga Sabalenka final match vawiruk khelhna ni tawhin, Madrid kha a zawna a tum lina a ni a; record ding lai nihrualpuia Madrid title pathum a lak tlin hma khan kumin chhungin Brisbane leh Miami lamah a lo champion tawh a ni.
Madrid-ah hian kum 2021 leh 2023-ah title a lo hlawhchhuak tawh a, nikum pawh khan final lut leh tho mah se Swiatek ngam loin runner-up a ni a; Madrid-a vawithum champion tling ve dang awmchhun Czech player Petra Kvitova chuan kum 2011, 2015 leh 2018 khan Madrid tlak lei chungah hian title a lo hlawhchhuak ve tawh a ni.