Sabalenka kutah US Open title leh Sabalenka bihchianna
Australia Open-a vawihnih champion ve tawh Belarus nula Aryna Sabalenka chuan Inrinni zan US Open women’s singles final-ah tantu ngah zawk tualchhung player Jessica Pegula of the United States laka 7-5, 7-5 hnehna changin Flushing Meadows, New York-ah a career-a a grand slam title pathumna a hlawhchhuak a, America leilung atanga major trophy chhuak leh thin hupbeh chak ngawih ngawih home fans hrilh a hai!
American sixth seed Pegula khan major final a khelh vawikhatnaah hnehna chang zo ta lo mah se Arthur Ashe Stadium-ah beisei lawk ang takin a tang na thei viau a, New York mipui lak atang pawhin thlawpna a hmu tha ngang mai a, mahse, a tumpui Belarusian second seed ruakhua zet talent kawl el pha tur em chuan a talent kawl a la tawngchham deuh a ni!
Ruahpui vanawn sur avangin Arthur Ashe Stadium chungkhuhna an pawt phui mup a, chuti chungin thli kha duh aiin a na a, tum hnih ngawt inkhel an chawlh phah a, celebrity rulal punkhawm tamna inkhelah kum 30 mi Pegula chuan home fans beiseina a tipuitling zo ta lo a ni.
Sabalenka bihchianna
American sixth seed Jessica Pegula hneha US Open title latu Belarusian Aryna Sabalenka hi kum 26 mi niin, WTA ranking-ah number two a ni a, US Open khelh zawh tak seeding-ah pawh khan number two bawk a luah.
Nikum leh kuminah Australian Open title la ve vein, ti hian, a career-ah Grand Slam title pathum a hui tling chiah a ni.
Minsk khawpuiah piangin a seilian a; kum ruk mi lek a nih lai atangin tennis a khel tan a, ITF Circuit-a a professional career a tan kum chu 2012 a ni.
Kum 2015 khan ITF Circuit-ah hlawhtlinna lian sualchhuakin singles title pathum leh doubles title pakhat a rut.
Kum 2016 khan a vawikhatna atan Rabat khuaah WTA qualifying event a khel a, a kumleh 2016-ah a WTA main draw hmasaber chu Dubai-ah a nghakchhuak ta a; kum 2017 khan WTA ranking-ah a vawikhatna atan top 100 luahin world number 78-na a luah chho.
Kum 2018 khan New Haven leh Wuhan khuaah WTA title a la ve ve a, a vawikhatna atan top 20 luah chungin season a khar a, world number 11 a ni.
Kum 2019 a herchhuah meuh chuan WTA singles title pathum bakah doubles title pathum ngawt hlapchhuakin, tah hian a Grand Slam doubles title hmasaber a tel a, a Belgian partner Elise Mertens nen thawkdunin US Open-ah an champion.
Hma a sawn zel a, kum 2020-ah chuan Doha, Ostrava leh Linz title lain joint Tour-leading record a siam hial a, ranking-ah pen khata san belhin a vawikhatna atan Top 10 huang a luah.
Kum 2021 a ni a, Abu Dhabi leh Madrid-ah champion lehin, grand slam tournament lamah pawh hma a sawi a, Wimbledon leh US Open-ah semi-final a lut.
2022 US Open semi-final khelin, a hma chiah kum ang bawkin hmeichhe season kharna WTA Finals khel turin a tling leh a, he tournament-ah hian ranking-a a sang pathum, top three player – Jessica Pegula, Ons Jabeur leh Iga Swiatek-te a hneh vek a, final-ah Caroline Garcia hneh loin runner-up a ni.
Nikum khan Elena Rybakina (Kazakhstan) hnehin Australian Open title a lawhchhuak a, hei hi a grand slam title hmasaber niin, nikum vek khan Wimbledon leh French Open semi-final a thleng a, US Open runner-up a ni bawk.
Kum 2023 khan a chunga a hlawhtlinna chante bakah hian Adelaide leh Madrid-ah title a la tel bawk a ni.
Nikum September thla khan a career-a ranking a neihsanber hun tawngbuain world number one a kai chho ta hial a ni.
January 2024 khan Zheng Qinwen hnehin Australian Open title a kawl lai a humhim a; French Open lamah quarter-final thlengin, dar hliamin a tihbuai zui tak avangin Wimbledon leh Paris Olympics-ah a inlan thei lo.
2024 US Open-ah sixth seed Jessica Pegula hnehin a champion zui leh ta a ni.
US Open 2024 final lut tura a kalkawng
First round : beat Priscilla Hon (Australia) 6-3, 6-3
Second round : beat Lucia Bronzetti (Italy) 6-3, 6-1
Third round : beat 29-Ekaterina Alexandrova (Russia) 2-6, 6-1, 6-2
Fourth round : beat 33-Elise Mertens (Belgium) 6-2, 6-4
Quarter-finals : beat 7-Zheng Qinwen (China) 6-1, 6-2
Semi-finals : beat 13-Emma Navarro (US) 6-3, 7-6(2)