Sabrina Carpenter hla hit ‘Please Please Please’ chu Billboard Hot 100 (singles) chart-ah a No.1 a, tunah chuan Billboard Global 200 chart-ah pawh a No.1 ve leh ta a, he chart-a a hla No.1 kai thei pahnihna a ni.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only streams (subscription leh ad-supported audio leh video music services) leh download sales te chu tehna pawimawh a ni.
‘Please Please Please’ hian kar khat chhungin stream maktaduai 119.2 leh sales 9,000 a nei thei a, hei hi chart-ah No.2 atangin No.1 a kaipui ta. Kar kalta chart-ah khan Sabrina hla dang ‘Espresso’ a No.1 kha a ni a, tunah a hla dangin No.1 a rawn thlak leh ta a, hetianga Billboard Global 200 chart No.1-a zaithiam ngai hla ve ve inthlak thei pahnihna a ni a, hetiang tithei dang hi Taylor Swift chiah a la awm a, ani hian nikum November khan a hla ‘Cruel Summer’ leh ‘Is It Over Now? (Taylor’s Version) [From the Vault]’ te chu No.1-ah an inthlak ve tawh a ni.
Sabrina Carpenter ‘Espresso’ chu No.1 atangin No.2-ah a tawlh a, tihian kar hnih chhung he chart No.1 leh No.2-ah ama hla ve ve a lang ta a, Sabrina hi hmeichhe zaithiam zinga kar hnih chhung he chart No.1 leh No.2-ah tum khata lang thei hla nei thei awmchhun a la ni a, mipa lamah pawh hetiang tithei hi Peso Pluma chiah a la awm. ‘Espresso’ leh ‘Please Please Please’ te hi August ni 23-a tlangzarh tur ‘Short n’ Sweet’ album atanga a single te an ni.
Billie Eilish ‘Birds of a Feather’ chu No.4 atangin No.3-ah a insawn a, Shaboozey ‘A Bar Song (Tipsy)’ chu No.5 atangin No.4-ah a insawn a, chart No.1 hlui Tommy Richman ‘Million Dollar Baby’ chu No.7 atangin No.5-ah a insawn thar ve leh ta bawk.
Sabrina Carpenter ‘Please Please Please’ a lar ber
Get real time updates directly on you device, subscribe now.