Sabrina Carpenter ‘Short n’ Sweet’ a No.1

Sabrina Carpenter album thar ‘Short n’ Sweet’ chu Billboard 200 (albums) chart No.1-ah a debut a, a No.1 album hmasa ber a ni. Hetihrual hian Travis Scott album thar ‘Days Before Rodeo’ pawh No.2-a a debut a, Lainey Wilson album thar ‘Whirlwind’ pawh top 10-ah langin, he chart top 10-a lang thei album a neih vawi khatna a ni ve bawk. Tunkar Billboard chart hrang hrang hi Labor Day chawlh Thawtannia an hman avangin an tichhuak tlai ta deuh a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna baka streaming atanga album hralhna tlukpui leh album a hla mal hralhna atanga album tlukpui te belhkhawm thin a ni.
Sort n’ Sweet hi kar khat chhungin 3,62,000 an hralh hman a, chung zinga 1,84,000 chu album tak tak hralhna niin, streaming atangin 1,76,000 (on-demand official stream maktaduai 233) tlingin, album-a hla mal hralhna atangin 2,000 a tling thei bawk.
Short n’ Sweet hi Sabrina album pasarihna a ni tawh a, he chart top 10-a a lan vawi khatna a ni bawk. He chart-a a lanna hmasa ber chu 2015 kha niin, a album ‘Eyes Wide Open’ chu No.43 a kai a, tuna No.1 a kai hmaa he chart-a a thlen san ber chu 2022-a a tlangzarh ‘Emails I Can’t Send’ niin, No.23 a kai. ‘Short n’ Sweet’ album hi a hla hit ‘Espresso’ leh ‘Please Please Please’ te awmna niin, ‘Espresso’ hi Billboard Hot 100 (singles) chart-ah No.3 a lo kai tawh a, ‘Please Please Please’ hi No.1 a kai tawh bawk.
Travis Scott 2014 mixtape ‘Days Before Rodeo’ chu 3,61,000 hralhin No.2-ah a debut a, he chart top five-a lang thei album panga a neihna a ni, ‘Days Before Rodeo’ hi album tak tak hralh zat chu 3,31,000 a tling a, kuminah chuan album tak tak kar khat chhunga hralh tam pahnihna a ni pha a, rap album-ah chuan kar khat chhunga hralh tam ber a la ni bawk. Streaming atangin 30,000 (on-demand official stream maktaduai 40.63) tlingin, album-a hla mal hralhna atangin 500 a tling lo deuh bawk a ni. He album hi 2014 khan hralh sum ni lovin, a thlawna ngaihthlak theihin a tlangzarh tawh a, tunah a kum 10 tlin champha pualin a man neiin a tlangzarh nawn leh ta a ni.
Post Malone ‘F-1 Trillion’ chu 1,11,000 hralh lehin, No.1 atangin No.3-ah a tawlh a, Chappell Roan ‘The Rise and Fall of a Midwest Princess’ chu 72,000 hralh lehin No.2 atangin No.4-ah a tawlh a, chart No.1 hlui Morgan Wallen ‘One Thing at a Time’ chu 58,000 hralh lehin No.4 atangin No.5-ah a tawlh a, chart No.1 hlui Taylor Swift ‘The Tortured Poets Department’ chu 57,000 hralh lehin No.3 atangin No.6-ah a tawlh a, Billie Eilish ‘Hit Me Hard and Soft’ chu 53,000 hralh lehin No.5 atangin No.7-ah a tawlh ta bawk.
Lainey Wilson album thar leh a album pangana ni bawk ‘Whirlwind’ chu 48,000 hralhin No.8-ah a debut a, he chart top 10-a Lainey Wilson album lang thei hmasa ber a ni. Lainey Wilson hi Grammy bakah CMA leh ACM award te pawh lo dawng zak zak tawh a ni nain, all-genre Billboard 200 (albums) chart-ah chuan tun hi top 10 a a lan vawi khatna a ni.
Zach Bryan ‘The Great American Bar Scene’ chu 41,000 hralh lehin No.6 atangin No.9-ah a tawlh a, Noah Kahan ‘Stick Season’ chu 37,000 hralh lehin No.8 atangin No.10-ah a tawlh ta bawk.