SAGY hnuaia Seling khua tih hmasawnna an thlirlet

Aizawl District Level Committee on Sansaad Adarsh Gram Yojana (SAGY) Phase-VI Seling chu an convener, district nodal officer Nazuk Kumar hoin Thawhlehni khan an thukhawm.
SAGY charge officer, DLAO Aizawl Dorothy Muansangi’n report a pe a, Seling khaw hmasawnna atana line department hnathawh hrang hrang bakah hlawhtlinna a sawi.
Hemi rual hian, Seling Village Development Plan-a project kalpui tawh leh hnathawh tawhte thlirlet a nih bakah project kal lai hmabak la awmte sawi ho niin, zawh thuai a nih theih nan ruahmanna siam a ni. Seling VCP chuan model village-a thlan an nih avanga lawmthu sawiin, hmasawnna tur hrang hrang la awm theite sawi ho a ni bawk.
Seling khua hi Lok Sabha MP C Lalrosanga’n SAGY Phase-VI hnuaia model village atana a thlan a ni a. Khawchhung hmasawnna (Village Development Plan) atana department 10 hunaiah project 38 ruahman tawh te chu thlir hoin, tun dinhmunah project 30 zawhfel tawh a ni a, thawh hmabak project 8 a awm. Project awm zawng zawng atanga zaa 79 vel zawh tawh a ni.
Village Development Plan hi 2022 October 17-a Lok Sabha MP hoa District Level Committee on SAGY Phase-VI Seling thukhawmin a pawm a ni.