Sairang thlenga rel lo lut turah FCS&CA a lo inruahman lawk

Sairang thlenga rel lut turah Food Civil Suuply & Consumer Affairs department a lo inbuatsaih lawk a. Rel hmanga buhfai leh mipui mamawh tul dang lakluh kawnga tih tur tul awmte tih loh ala awm em tih minister B Lalchhanzova hoin Thawhlehni khan an enfiah.
FCS&CA minister chuan September 13-a Prime minister-in rel kawng a hawn rual rualin passenger leh bungrua phurhna atan hman nghal tur a ni dawn a. An ni pawhin inbuatsaih dan an ngaihtuah a, bungrua lo thleng thiar leh phurh chhuah leh dan tur bakah Sairanga Supply kudam leh FCI (Food Corporation of India) kudam dinhmun an enfiah tih a sawi.
Thuthar thehdarhtute zawhna chhangin minister chuan, Sairang thlenga rel a lo luh dawn takah chuan, buhfai pawh hemi thleng hian phurh theih a ni dawn a. Kolasib- Rengtekawn FCI kudam tih loh, Aizawl leh district danga FCI kudam chu Sairanga an kudam atang phurhchhuah theih a ni dawn a, Bairabi – Sairang inkar kawngpui zawhtu buhfai phur truck a tlan tlem sawt anga, buhfaia sumdawngten an chhawr tangkai thiam chuan open market hmanga buhfai lei pawh rel hmanga lakluh a nih chuan chak leh man tlawm zawkin an tih theih an beiseipui a, chu chuan mipuiin buhfai an leina man thlengin awmzia a neih theih an beisei tih a sawi a ni.
NF Railways hotuten zawhna an chhan danin, rel chuan man tur hi an la tifel chiah loa, hawn a nih hma chuan an puang fel hman turah an inngai tih an sawi a ni.
Sairang rel station-a buhfai leh bungraw dang phurh hlanthlakna tur leh hemi kaihhnawiha a buaipuitute awmna – office, chawlh hahdamna leh inthiarna tur thlengin buatsaih tum a ni a. FCS&CA minister hian Railways hotute chu a rang thei ang bera peihfel turin a chah a, an enzui zel tur thu a hrilh.
Sairanga FCI kudam leh Supply kudam ruahman mek pawh B Lalchhanzova hian a tlawh a. FCI kudam hi pathum siam tur niin, pahnih – buhfai metric ton 5000 leh MT 2500 len theihna tur an siam zo tawh a, kumin December-ah chuan hman theih tawh tura ngaih a ni. MT 2500 len theihna tur kudam dang sak tum mek chu nakkum March-ah peih hman an tum tih contractor-te chuan an sawi.
Sairanga Supply kudam hi pali sak a ni a. MT 3500 lenna tur chu peihfel thawkhat a ni a, MT 1500 pakhat sak tan mek niin, leh MT 1000 lenna tur pahnih pawh peihfel tawh a ni.