Sakhaw ni pawimawh leh Centre

India ram hi sakhaw zalenna ram, secular state a ni a, sakhaw hrang hrangin mahni sakhua theuh zalen taka an biak theihna ram a ni. Eng sakhua pawh ni se, an sakhaw ni pawimawhah, sawrkar emaw pawl emaw, khawtlang emaw-in programme pawimawh dang hmang turin a tilui thiang lo a; tih luih/nawr luih chu sawi loh, sakhaw kalphung leh tihdan chu sawrkar emaw, pawl emaw, khawtlang emaw te chuan an zahsak em em zawk tur a ni.
Hetih lai hian, ni pawimawh bik national day kan tih heng Independence Day leh Republic Day ang te hi chu, sakhaw ni pawimawhah lo tla palh pawh ni se, sakhaw biakna tibuai lo zawnga her rem chunga hman tho ngai chi a ni.
Sawrkar laipuiin ram pum huapa a ruala hman tura eng emaw programme a ruahman chawp thin angah hian, keini Kristiante ni pawimawh Chawlhnia a tlak changin, pawl emaw, political party emaw, kohhran emaw ten a hun sawn turin sawrkarah an thlen thin a, sawrkar pawhin a lo remtihpui mai thin. Hetiang nikhua hian, sawrkar laipui pawhin ‘enga tinge programme duan anga in zawm loh?’ tiin a rawn khak hran lem lo niin a lang. Hetiang nikhuaah hian, tute emawin sawrkara thu an thlen kher ngai lo va, a hun siam rem mai hi kalphung ngheta neih law law hi a fihlimthlak phianin a rinawm.
Hun kal tawh han thlir kir ila. Kan ni pawimawh ber Krismas ni ber kher Good Governance Day puanhnan a han ni mauh mai te kha, ‘national integration’ ngai pawimawh democracy ram lian ber tan chuan a inhmeh lo hle a, inrahbeh tumna ang hiala ngaih theih niin a lang. Krismas te chu Kristian ten khawvel huapa kan ni pawimawh ber a ni a, hai rual a awm lo va, ‘an sakhaw ni pawimawh ber nen a insu buai dawn tlat mai’ tih aiin, ‘an sakhaw ni pawimawh ber tibuai deuh laih turin awm ni ang…’ ti an ang hle a ni.