Sakhua ten Neih-Inang Inneih remti lo vek

Sakhua hrang hrang hruaitute chuan, neih inang inneih same-sex marriage phal tur leh tur loh Supeme Court-a ngaihtuah mekah, phal a nih loh nan an inlungrual hle.
Supreme Court-ah same-sex marriage phal a nih theih nana petition theh luh a ni a, a then te chuan President chu inrawlh turin an ngen bawk a.
Jamaat-e-islami Hind, Jamiat Ulama-i-Hind, Communion of Churches, Akal Takht bakah Ajmer dargah leh Jain gurus aiawhte chuan same-sex marriage phal tumna awm anga lang chu duhlohna lantirin natural family order kalh leh an sakhua biak theuh kalh a ni, an ti a.
Sakhaw hruaitu tam tak te chuan inneihna chu din thar lehna ni lovin institution-in a hrin a ni an ti a. RSS te chuan same-sex marriage chu duh lo bur bawkin mahse same-sex relationship erawh Central sorkar duh dan angin a pawm thung.
Supreme Court Bench chuan he case ngaihtuah hi public interest tiin April 18 atangin a ngaihtuah lai live in a pe chhuak dawn a ni.
Jamiar Ulama-i-Hind te chuan same-sex marriage legal validation tumna chu duhlovin Supreme Court ah ngenna an thehlut tawh a. “Inneihna hi neih inang lote inkawpna niin chu chuan rights tam tak (maintenance, inheritance, guardianship, custody) a hring nghal a. Petitioner te hian inneihna concept chu same-sex marriage concept hmangin free-floating system kalpui an tum a ni,” tiin an sawi.
Media statement an tihchhuahah Jamaat-e-islam vice president Salim Engineer chuan mipa leh hmeichhia inneihna chu inneihna ‘dik’ tiin a sawi a. “Jamaat te chuan same-sex marriage hi a pawm lo. Inneihna kan tih hian mipa leh hmeichhia inneihna chu khawvelin a pawm niin an ngai a. Chu mi tihhmelhem tumna chu civilizational values kalh niin he rama personal law tam tak bawhchhiatna niin kan ngai,” tiin Engineer chuan a sawi a, “Same-sex marriage remtihna chuan ram chhunga family system ngelnghet tak awm sa dinhmun derthawngah a siam dawn a ni. Society-a mipa leh hmeichhia te rights a bawhchhia ang,” tiin a sawi bawk. Engineer chuan Section 377 puitling kumtling chin tena zalen tak sex an hman theihna remtih chu an dodal tiin a sawi bawk.
Ajmer dargah aiawh Salman Chishti pawhin personal law leh societal values pawm tlan leh inbuktawk tak chu dinhmun derthawngah a awm mek tia sawiin Islamic rin dan chuan same-sex marriage chu remtih theih loh a ti bawk.
Jain guru aiawh Acharya Lokesh pawhin same-sex marriage remtih a nih chuan tun hma atanga society in values a neih te a kalh dawn a ti a. Jainism ah pawh inneihna chu inthlahchhawn nana pawimawh leh family tree zauhzelna a ni tia sawiin chutak chu same-sex marriage alliance-ah chuan a theih loh a ti bawk.
Communion of Churches pawhin inneihna chu Kristian rinnaah chuan divine institution a ni an ti a, same-sex inkawp chu inneihna a tling loin a remlo an ti bawk a. Communion te chuan he mi chungchangah hian President hnenah thu thlen an nei bawk a.
Sikh leadership Akal Takht te pawhin same-sex marriage chu an duh loh thu an tarlang bawk.
A hmain Rashtriya Swayamsevak Sangh (RSS) te chuan ngaihdan hran neiin same-sex relationship chu an dodal loh thu sawiin mahse same-sex marriage chu an pawm thei lo an ti a. Hei hi kum 2018-a RSS tena same-sex consensual relationship an dodalna nen chuan a inkalh ta thung. Sarsanghchalak Mohan Bhagwat chuan Lord Krishna General Dimbhaka kha a thih khan General Hans pawh a intihlum nghal a, an pahnih khan homosexual relationship an lo nei a ni thei a ti bawk.
RSS te erawh Centre thlawp an ni a. “He thilah hian sorkar tanna kan thlawp,” tiin Hosabale chuan Prime Minister-in Rajya Sabha a, “Same sex marriage chuan ram chhunga personal laws te a tibuai vek dawn,” tia sawi chu an thlawp thu a sawi.
March 13 khan Supreme Court Chief Justice D.Y. Chandrachud chuan three-judge Bench a kaihhruainaah same-sex chungchang ngaihtuah mek chuan constitutional rights of life, liberty, dignity, equal treatment of LGBTQ te kawngkhatah leh kawng lehlamah biological mipa leh hmeichhia inneihna te a kaihhnawih vek tiin a lo sawi tawh a.
Three-judge Bench, Justices P.S. Narasimha leh J.B. Pardiwala te pawh telna chuan Article 145(3) of the Constitution sawi langin five-judge Bench-in a ngaihtuah a ngai a ni an ti a, thil pawimawh chungchang a nih avangin a tlem berah judge pangain an ngaihtuah ngai a ni, an ti a ni.
Petitioner thungte chuan 2018 a Navtej Singh Johar court judgement a mimalin right to family leh choice of partners a neih dinchantira homeosexuality drecriminalisation chungchang sawi langin, “An sexual orientation emaw gender identity hmang ngawtin right to love and marry chu chhuhsak theih an ni lo. Right to marry hi decriminalisation judgment-in a hrin nghal loh theih loh a ni,” tiin senior advocate A.M. Singhvi chuan a sawi thung.