Saksham 2025 – 2026 Closing Function-ah thu ka sawi
Lallunghnema
Charity Lodge
Cont: 9862288182
Consumer Huang chhiartute chibai ka bûk a che u. In hun leh nî te tha taka hmang turin duhsakna ka hlan a che u.
Kâr hmasa khan In luahtute leh In neitute dikna leh chanvo hungna Rental Rules chungchang ka ziak a. India Sawrkar ropui takin New Rules for Renter a siam thu leh hman a nih chuan in luahtu (renter/tenant) te thil lawmawm tak a nih tur thu ka ziak nghe nghe a ni. Mizoramah pawh hian he Renting Rules hi hmang se chuan mi tam tak tan thawvenna a thlen ngei dawn a ni. Tin, In luahtute phurrit a chhawkzia tur thu ka sawi bawk a ni.
Mihring khawsaknaa bet tlat, tuialhthei pawimawhziate kan sawi châm chi a. Chutiangin Minister leh Indian Oil Corporation (IOC) DGM (LPG – E) Pu Lhungdim hova Saksham an hman hi hlawhtling tura ngaih a ni a.
Chawlhkâr hnih chhung zet Saksham 2025 – 2026 hi, ‘Conserve Oil, Go Green, ‘ tih thupui neia hman chu ni 16 February, 2026 Thawhtanni khan kharna inkhawm hman a ni a.
He Programme hmanna hmun hi Mineco-a IOCL Retail Outlet-ah a ni. Kei pawh he Programme-a tel tur hian min sawm a. Thusawi tura sawmna pek ka ni bawk a. Ka lawm hle. Khuallian hi Pu B Lalchhanzova, MOS, Food Civil Supplies & Consumer Affairs a ni a. Thu a sawi bawk. Legal Metrology Department – a Dy Controller, Pu Johny leh Pu Lalhmuaktluanga Managing Director, MIZO FED – te leh Pu Rothangpuia Chairman MIZO FED – te pawh mipui lamah an thu a, a thlamuanthlak khawp mai.
Pu Lhungdim DGM min duhsakna zarah thupui sawi tura min ruatsak hi ‘Oil + Gas ren chem’, a ni a. Phur tak leh nuam ti takin he thupui hmang hian ka han inpho chhuak ve a. Chuta ka sawi tlangpui chu hengte hi a ni. Petrol pump (outlet) thenkhat bul lawka Petrol Black-a zuar leh lei tur awm hi tihtawp vat tur a ni. IOC leh thuneitute hian hma la thuai se a duhawm hle mai. Black-a thil zawrh hi Dan bawhchhiatna a ni a, a kristian lo hle a ni. Mahni motor khalh chhuah loh ngam a, intihhmuh a tul hle. Motor khalh chhuak lote hian Oil renchem kawngah an thawhhlawk hle thei a ni. No Vehicle Day hman hi Sawrkar hian ti se, nasa takin Oil kan renchem thei ang a, pawisa tam tak kan hum thei a ni.
Petrol hi teh tling ngeia pek chhuah hi a ngai a. Oil renchemna tha a ni. Thil tul leh mamawh tak takah chauh Oil leh Gas hi hman tur a ni. LPG Gas te pawh hi eirawngbawl nan hman a ngai. Vawk chaw chhum nan hman loh tur a ni. Thil chhuan a sat tawh chuan Gas hi herh hniam tur a ni. Buk tling ngei a thil buk hi kan intihhmuh a ngai em em a ni. Kristian kan nih angin dik taka thiltih thin hi a mawi a ni.
Customer care hi Petrol Pump -a thawkte leh Gas Distributor-ten ngai pawimawh rawh u. Gas Distributor te leh an Staff zingah Customer Care nei tha in tam hle a. Customer-te ngai pawimawh leh hawihhawmte chu dawr kan châk fo thin. Kristian nun nên a inhmeh em em a ni. Customer -te ngaihsak lo leh lo chapopuia, lo chapo khumtute hi mi entawn tlak an ni ngai lova, an hlawhtling ngai hek lo. “In thuvawn chu, “Customer satisfaction is our motto”, tih ni rawh se, tih chu ka thu tawpna a ni. Customer-te hi in tan an pawimawh ber a. Consumer-te tel lo hna thawh tur a awm lo, tihna a ni a, consumer-te hi indirect-a hna petu an ni tih kan hriat a pawimawh. Heng consumer-te tel lo hi chuan hna a buai thin. Hna kal lai a tawp thin, ka ti a ni.
He Saksham Programme-a kan khuallian Hon’ble Minister Pu Lalchhanzova thu sawi hian rilru a hneh hle mai. Ka lo ngaihthlak thiam dan chuan, “Midang tanpui hi mahni intanpui tluk a ni”, tih a ni a. He thusawi hi a rilin hrilhfiah nuam tak, sawi nuam tak, tih erawh harsa a ni thei. Mahni hmasial lo mi, nunngil, mi zik tluak, midangte tana inpe, mi te tan erawh fuihna tha tak a ni a. Sumdawngte innghahna bul ber tur chu a ni.
Mizoramah hian hmun hrang hrangah Petrol Pump sawm tam kan nei mek a. Gas Agent te pawh chuti tho. Heng hi mipui rawngbawlna leh mipui thil a ni. Hengho tel lo chuan kan dam khaw chhuak zo tawh lo. Mizoram hmun kil khawr ber bera mite leh chhungkaw tin deuh thawin LP Gas kan hmang ta! Heng LP Gas Consumer ho hian motor an nei deuh vek bawk. Ke pali nei lovin ke pahnih nei tal an kawl thin. Hengho hian motor khalh nan tui an hmang lova, eirawngbawl nan tui an hmang hek lo. Oil leh Gas renchem chu an tan zangkhaina a ni a. An tan Gas leh Oil hisâp nei taka an hman chuan an mahni leh anmahni an intanpui a lo ni a. Midangte tana malsawmna an nih rualin anmahni tan ngei pawh malsawmna an ni thin. Ram bua leh chereu nasa lutuk tur ven hna thlengin kan thawk thei a lo ni. Tui hnâte tipinga hnianghnarna thlentute chu, ‘Conserve oil, Go green’, tih thupui vawng tlat consumer-te hi a ni.
Consumer right ngaihsak lo politician chu tho lovin a tlu ang.