San Marino-ah pawh Marquez bawk chak leh

On Sep 10, 2024 20 0

September ni 1, 2024 khan kum thum chhunga a vawikhatna atan Spain rama Aragon MotoGP-ah Gresini Ducati rider Marc Marquez a chak a, tun Pathianni liamta mai khan Spaniard bawk hi San Marino Grand Prix-ah a thleng hmasa leh ber a, race hnuhnung pahniha hnehna a chan hnu hian championship standing-ah hma a sawn hle tawh a, pathumnaah awmin hmahruaitu Jorge Martin nen point -53-in an la inthlau a, standing-a pahnihna luahtu Francesco Bagnaia chu Misano tlankawngah pahnihna niin, a chung chiaha awm Martin nen point sarih chauhin an inthlau tawh.
Vawiruk ngawt world champion ni tawh Marquez kutah point sang ber a luh tum hian Misano tlankawngah Pramac Ducati rider Martin chu 15-na daihah thlengin point khat a rut ve hram a; title race-ah a dinhmun a him lo zual ta hle a ni.
San Marino Grand Prix-ah hian Bagnaia team-mate leh a chipui ni bawk Enea Bastianini chuan lawmman semna dawhsan hniam ber luahin pathumna a hauh.
Red Bull KTM bike khalhtu Brad Binder chu palinaah thlengin, Marco Bezzecchi chuan panganaah VR46 Ducati a thlenpui a; Alex Marquez (Gresini), Fabio Quartararo (Yamaha), Fabio Di Giannantonio (VR46) leh KTM wildcard Pol Espargarote’n dawtin, Miguel Oliveira (Trackhouse), Johann Zarco (LCR), Takaaki Nakagami (LCR), Stefan Bradl (Honda) leh tarlan tawh Martin-te chu point hmu ve dang an ni.
Pathianni race-ah Marquez chuan pakuana atangin bul a tan a, Misano tlankawng huhah chetha lehin Martin nena an inkar a pawtzim leh duai a ni.
Hnehna a chan zawhah Spaniard Marquez chuan ruah sur zawha a speed kha a hlawhtlin chhan pawimawhber leh hma a hruai theih chhan a nih thu sawi chungin hnehna a chan rual chiaha a hnuk ulh teuh thu leh a hlim em em thu a sawi.
MotoGP San Marino Grand Prix tir lamah ruah tam vak lo a sur a, rider-te tan tlan thiam a ngai viau a, kum 26 mi Martin a chefuh zo leh ta lo a ni.
Tunthla tawp lam hian Misano-ah bawk title race a kirleh dawn a, Kazakhstan rama intlansiak dah tawh an hnuhkir leh avangin Emilia Romagna GP hmangin Misano tlankawngah MotoGP rider-te an fuankhawm leh dawn a ni.