Sangau chhehvelin kar thum power nei tawh lo

Lawngtlai district-a Sangau leh a chhehvelah kar thum chhung vel power supply a khaihlak tawh a, mipuiin harsatna an tawk nasa tan hle tih sawi a ni.
Sangaua journalist FC Vanlalzawna sawi danin, Sangau 33 Kv Sub Station hian Hnahthial atangin power a lalut a, Hnahthial atanga Sangau lam pek chhuahna transformer lian a chhiat avangin a thara thlak a ni a, thlak a nih hnu pawhin transformer hi Power & Electricity department chuan an la peihfel thei lo.
Power supply a awm loh avang hian Supply department hnuaia retailer-ten buhfai khulhna atan pawh MPOS machine (electric current-a charge ngai) an hman vek tawh avangin mipuiin buhfai khulh chhuah kawngah harsatna an tawk mek a; damlo leh natna benvawn nei electric current hmanga enkawlna dawn ngaite pawhin harsatna tawkin, electronics lam leh electric kaihhnawiha eizawnna kalpuiten harsatna an tawk nasa zual bawk. Tui lama Sangau mipui chawmtu ber Cheului tui lakna, Pump House atanga electric current hmanga tui pump-naah harsatna lian tak tawk bawkin mipuiin an tuar nasa hle tawh tih a sawi a ni.
Hnahthial atanga eng pek chhuahna transformer lian chhia hi kar thum dawn ral hnu pawhin peihfel theih ala ni lo niin P&E department thawktute chuan an sawi a. Hnahthial atanga power pekchhuahna dang pakhat chauh hmanga inen chhawk tura ruahmanna kalpui niin, Sangau leh a chhehvel khuate hi zan rei hnu, zanlai dar 12 leh zing dar 6 inkarahte power supply hi pek ve thin an ni a, hei pawh hi a chang chauha pek a ni tih FC Vanlalzawna hian a sawi bawk.
Hei vang hian sawrkar hotute leh a concerned department-in tun aia chak zawka hma laksak a, electric current inen chhawk chungchangah pawh mipui mamawh hun pangngaia power supply pek ve thin an mamawh takzet niin a sawi.
Hetihlai hian ruahsur leh thlitlehin Mamita electric line a tih chhiat avangin June 14 zan atang khan Mamitah power supply a awm tawh lo nia thu dawn a ni. Mamita Zongaw-ah thli chhem thluk thingtluin electric ban pahnih a tih tluk bakah hmun thenkhatah electric hrui a vaw chat a, electric ban tlukna panna kawngpui, electric ban phurh luhna tur chu thing lian tluin a dang bawk. Hei hi Zirtawpni tlai khan lirthei kal theiha tih tlang ni tawh mah se, electric ban phunchawp a la ngaih dawn avangin power supply hi vawiin lamah beisei ngam chauh a nih rin a ni.