Sangau – Saisihchhuah kawng sialna tur a thlawnin pe thei lo

Sawrkar laipuiin Sangau to Saisihchhuah kawngpui sialna atan sum pechhuak tawh mah se, Mizoram sawrkarin kumin June thleng kha chuan a thlawnin ram a la pe thei lo.
Parliament Session kal mekah Union minister of DoNER Dr Sukanta Majumdar-a’n Mizoram Rajya Sabha MP K Vanlalvena zawhna a chhang danin, 2021 February 10 khan Sangau to Saisihchhuah kawngpui sialna atan cheng vaibelchhe 66.08 sanction a ni a; he hna thawk tur hian Border Roads Organisation (BRO) thlan an ni. Motor kawngpui kalna atan Mizoramin June 2024 thlenga ram a thlawna a pek theih loh avangin he kawngpui laih tura sum sanction tawh chu hnuhkir a ni, tiin a chhang.
Thingsai to Pangkhua- Sangau Road project-ah Sangau- Saisihchhuah -Siallam road hi laih turin 2023- 2028 chhunga thawh atan General Staff (GS) funding of BRO scheme-ah dah a nih tawh zawk thu minister hian a chhang bawk.
Union minister of School Education ni tel Dr Sukanta Majumdar chuan K Vanlalvena zawhna dang chhangin, Lengpui hmuna National Institute of Technology (NIT) permanent campus sakna tura sawrkar laipuiin sum a sanction zat chu cheng vaibelchhe 669.75 a ni tih a sawi a. Forest clearance tifel turin sawrkarin tih tur tul apiang tih mek a ni a, NIT Mizoram chu kum 2010 academic session atanga tan niin, tunah hian zirlai 668 an awm mek tih a sawi a ni.