Sangha-ah tan lak a ngai…

Fisheries director chuan Mizoramin phai lam atanga sangha a lakluh thin thenkhatah a vawn thatna atana hman formalin sulhnu a awm thu tunhnai khan a sawi a. Hei hi mihring tana pawi tham lo anga sawi ni mah se, finfiahna chiang tak erawh a awm lo niin a lang.
Mizoramah hian sangha dil nei mi 18,519 awm anga chhut a ni a, sangha dil zau zawng hi hectare 5,759 anga chhut a ni bawk.
Sangha dil hi hmun khatah pawt khawm ta ila, a zau zawng hi kilometre 57 bial tihna a ni. Heti khawpa sangha dil zauah hian kum khata sangha tharchhuah chu quintal 50,298.5, chu chu Kg 50,29,850 (Kg nuai 50.29) tihna a ni. Mizoramin kum khat chhunga sangha a mamawh zat hi a tlem thei ang bera chhutin Kg nuai 120 vel a ni a. State dang atangin kum tin sangha Kg nuai 70 deuhthaw kan chawlut ziah tihna a ni a. Chawhrualin sangha man hi Kg khat Rs 100 anga chhutin, Mizoram hian sangha manah kum tin cheng nuai 7000 state pawnah kan thawn chhuak thin tihna a ni; hei hi a tlem thei ang bera chhut a ni. State pawna sangha mana kum tina kan thawnchhuah hi fisheries department budget let 6 aia tam a ni.
Sangha dil zau tak nei si, sangha dil siamtu tam tak awm bawk si, engatinge state pawna thawnchhuak ur ur tur zawk kan nih laia heti zat zet state pawn atanga sangha kan chawkluh hlauh si? tih hi zawhna lian tak a ni.
Kan sangha dil zau zawng leh sangha dil siamtu tam lam han chhut hi chuan, intodelh bakah state economy chawikan awkna tham kan tharchhuak thei tih hi a lang a. Enga tin nge chu chu kan tih theih loh tih hi a chhanna kan zawnchhuah tur pawimawh tak a ni.
Kan sangha lakluh lah, hriselna khawih pawi thei formalin-a chulh te a lo nih thin bakah, sangha tharlam pawh ni lo, kawnglaka ni tam tak vur zinga dah, Mizoram a lo thlen hnu pawha rei tak la kawl zui kan ei thin lehnghal. Sangha-ah hian tanlak a ngai a, tanlak pawh a har lo ang.