Sangha khawnvartui rim nam, a chhan hriat rih loh

Phai atanga sangha lakluh, Mizoram mipui ei tlanglawn, rohu
sanghaah khawnvartui rim nam a awm a, hei hi a chhan hriat a la ni lo. A chhan hriat a la ni lo mai pawh a ni lo, a chhan hi hriat a har viau rih.
Health & Family Welfare department hnuaia Food & Drugs Administration Wing-in rohu sanghain khawnvartui rim a nam tih an hriatin a chhan hriat an tum nghal a, mahse a chhan hi hriat a la ni rih lo.
Sangha hi a chhiat har nan leh a uih har nan te formalin an hmang thin a, antibiotic an hmang thin bawk. Chutiang chu Mizoramah a enfiah theih mai a, khawnvartui rim nam chungchang erawh Mizoramah enfiahna khawl a awm lo. Phai ram hmun dangah pawh chutiang enfiahna khawl chu a lo vang hle.
Food & Drugs Administration Wing lamin hmarchhak leh hmun hrang hranga laboratory an bepawp tawh a, mahse a enfiahna tur khawl an lo nei lo. Kolkata-a Central Food Laboratory meuh pawhin an lo nei lo a, anni hian Kerala-a Kochi-ah a awm mai thei tih an lo sawihmuh avangin Kochi lam hi an be leh mek.
Food & Drugs Administration Wing hotute chuan sangha khawnvar tui rim nam chungchang hi laboratory lian an biakte pawhin mak an ti a, an thil hriat ngai loh a nih thu leh an bangbo thu tein an lo chhang tih an sawi.
Mizorama lakluh roho sangha hi Andhra Pradesh atanga lakluh a ni a, Silchar-ah sumdawngte’n an chah thleng a, chuta tang chuan Mizoramin a la ve leh a ni.
Food & Drugs Administration Wing lam hian Silchar-a a laluttute hi an zawtfiah tawh a, anni lam pawhin a ngaihna an hriat loh thua chhangin, a bawm hi hawng lovin an thawnchhuak ve leh tiin an lo chhang tih thu dawn a ni.
Food & Drugs Administration Wing hian May ni 26 khan thuchhuah siamin fimkhur turin mipui an chah a, a zuarte pawh mohu sangha lalut rih lo turin an ngen. Engmah finfiah a awm loh avangin khap ngawt theih a ni lo a, fimkhur tura inchah hi tuna tih theih chu a ni mai e, Food & Drugs Administration Wing hotute chuan an ti.