Sangha manto ber

Sangha manto ber
Sangha hi sa hrisel a ni a, vitamin leh mineral chi hrang hrang a pai tam tih chu ka hre fur tawh ang a, tun tum hi chu sangha manto zet mai, bluefin tuna, Japan pawisa yen maktaduai 510 (cheng vaibelchhe 29 vel) a an hralh thu kan sawi dawn a ni.
He sangha hi kumina bluefin tuna an lilam hmasak berah hetiang khawpa to hian an hralh tei a, khawvela sangha manto ber record a siam. He bluefin tuna hi kg 243 a rit a ni a, an lilamnaah hian a leitu hming leh nihna an puangzar lo a, hei vang hian tunge a leitu tih hriat tumin an ngaihven nghal hle a, hriat pawh an hrechhuak rang khawp mai.
Yen maktaduai 510 a bluefin tuna, kg 243 a rit leitu chu Kiyoshi Kimura a ni a, ani hi Japan-a company hriathlawh tak Kiyomura Corporation neitupa a ni. Ani hian tuna sangha hi a ngaina a, manto tak takin a lei fo tawh a, a hming lemah ‘Tuna King’ te pawh an tihial a ni.
Kimura hian sushi restaurant chain changkang tak Sushi Zanmai a nei a, a bluefin tuna lei te hi sushi siam nan an hmang thin a, kumdangah pawh bluefin tuna hi to tak tak a lei tawh thin.
Tuna an tuna manto, khawvela sangha manto ber record siamtu hi Japan hmarlam Oma bula an man a ni a, hetilai vel hi bluefin tuna tamna leh bluefin tuna rau rauah sanga chitha bik tamna niin an sawi.
Japan-ah hian bluefin tuna hi an ngaihlu hle a, a sa an ei mai piah lamah kum bul tanna a bluefin tuna lilamna a huai taka chhan a, manto taka an lei chuan kumtluanin an eizawnnaah an tluang duh riau niin an ngai thin a, hei vang hian kum bul tanna bluefin tuna lilamnaah ian company hrang hrangin an chhang huai riau zel a ni.
Bluefin tuna chu eng vanga to viau nge maw a nih le? Hetiang sangha hi khawvela sangha ei chi-ah chuan an dah san ber a ni a, a sa a nem a, thau tha chi a ngah a, thial leh lem a nuam a, a dul bawr hi otoro an ti a, a hmui tui hle niin an sawi.
Bluefin tuna te hi man mai mai tur a vang tawh hle a, tuipui thuk tak bakah a pawnlang deuhah te an awm thei a, mel sang chuang chuang te an kal kual thin a, hei vang hian man an har riau a, sorkarin man phal chintawk neiin a khuahkhirh ve leh bawk a, hei vang hian a vâng a, chu chu a mantona chhan pakhat a ni.
Bluefin tuna hi sangha lian thei tak an ni a, kg 450 thleng te pawh an ni thei a, a lian leh a upa apiang a man a to ve zel bawk. A len leh a rih avangin man leh lak sawn vel te a harsa a, chutah a duhtu an tam a, demand a sang bawk si avangte, khawvelah sushi a lar telh telh avang tein bluefin tuna man hi a sang ta viau a ni.
He bluefin tuna hi khawvela sangha manto ber record a ni a, India bika chuan sanga an hralh to ber chu ghol fish a ni a, September ni 1, 2021 khan Palghar, Maharastra-ah cheng vaibelchhe 1.33-in an hralh. Ghol fish hi damdawi atana thatna nei niin an ngai a, cosmetic leh damdawi-ah an hmang thin a, Hong Kong leh Japan velah pawh demand a sang hle. Nikum October khan Purba Madinipur, West Bengal-a sangha chi khat, Telia Bhola an man chu Rs 60,00,000 velin an hralh bawk.