Sanghalin ASF vei tih finfiah leh

Mizoram vawkin ASF an vei a, sanghal pawhin an vei. Kum hmasa lamah khan sanghalin ASF hi an lo vei tawh a, tun hnaiah pawh an finfiah leh.
September ni 24 khan AH&Vety department-in sanghalin ASF an vei tih an finfiah a, AH&Vety hian Vety College an endiktir bawk a, ni 26-ah anni pawh hian an finfiah ve leh.
AH&Vety department atanga thu dawn danin, tun hnaiah Saipum ramah sanghal ruang hmu an awm a, AH&Vety department hnenah an sawi a, Kolasib DVO-in an mite tirin an endik a ni.
Sanghal ruang hi a lo chhe tawh a, mahse a ruh lian lai, a malpui ruh vel an endik ta tho a ni. AH&Vety department hian anmahni endik bakah College of Veterinary Sciences & Animal Husbandry, Selesih lamin endik bawk se tiin an thawn a, kha sanghal khan ASF a vei tih an finfiah ve ve.
African Swine Fever (ASF) hi vawk bakah sanghal leh phivawkin an vei thei a, Mizoramah sanghalah hian kum hmasa lamah pawh ASF hi finfiah a lo ni tawh.
2021-ah khan Thenzawl rama Mat lui kamah sanghal ruang an chhar a, ASF hi finfiah a lo ni tawh. 2024 August ni 29 khan Lunglei district-a Bungtlang West-ah sanghal ruang engemaw zat an hmu a, AH&Vety department-in endik tum mah se endik theih loh khawpin a lo chhe hman. Hemi tuma sanghal ruang an hmuh hi, 25 vel ni tura ngaih a ni.