Sap missionary ‘Pi Vaili’ vuiliam

Siaha district-a Mara hnam zinga Sapram atanga missionary-a an chhungkuaa rawn chhuak zinga luphum hnuhnung ber ni ta Rev. Violet Louise Anne Mark @ Pi Vaili (85) chu Nilaini khan a chenna Saikao (Serkawr) ah kohhranin a vuiliam.
Thlahna leh vuina inkhawm hi Saikao Mission Compound kawtah chhawng hniha buatsaih niin, Congregational Church of India (Maraland) executive secretary Rev Z Hrohmo chuan a kaihruai a, kohhran hrang hrang leh pawl hrang hrang aiawhten thlahna thuchah sawiin pangpar an hlan a. Siaha leh khaw hrang hrang atanga thalai kalkhawmten Halleluiah Chorus an rem a ni.
Chawhnu lamah vuina hun hman niin Evagelical Church of Maraland Assembly moderator Rev Phosa Chozah chuan a vui a ni.
Mara hnam zinga chanchintha meichher chhitu Rev RA Lorrain thlah, an tunu la dam awmchhun Violet Louise Anne Mark hi a nu leh pa te ang bawkin an rawngbawlna hmunah a lu phum ta a, RA Lorrain thlah he hmuna luphum zinga a pangana a ni.
Pi Vaili hian a pasal Rev L Mark, a fate 4 leh a tu engemawzat a kalsan a ni.
Rev Violet Annie Mark hi Rev AB Foxall leh Louise Marquerite Tlôsai Lorrain te fanu neihchhun a ni a. Saiha district Serkawr (Saikao tia thlak a ni tawh) khuaah 1938 April 16-ah a piang a, 1968 December 11-ah Mara tlangval Rev L Mark, Saikao nen inneiin Rev. AB Lorrain Foxall-a’n a kutsuih a ni. Pi Vaili hi Mara hnam bakah Mizoram hmun dang atang pawha ngaisangtu ngah tak niin, tlawhtu pawh an tam thin hle a, chanchintha an hrilna enga Siaha district-a kohhran thuang hnih – ECM leh CCI(M) a kalte inpumkhat lehna chu a a duh leh thupui ber pakhat a ni a, hemi atan hian tunah hmalakna pawh thui tak kal tawhin, a ruang chungah pawh sawi uar pakhat a ni tih Saikao atanga thudawnna chuan a sawi.
Nilaini hian Saikao-a hun hman rual hian Siaha district hmun hrang hrangah kohhranten Pi Vaili thlahna hun hi an hmang a. Siaha-ah pawh sumdawnna hmun kharin hun hman a ni tih thu dawn a ni.