Sawhthing buaipui dan hi…

Sawhthing chingtuten hlawkna an tel ve theih dan tur sawrkarin a ruahman, di-a-eich DAH hnuaiah sawrkar kum 2024-25 chhung khan kuthnathawktute sawhthing leina leh senso dang atan sawrkar chuan cheng vaibelchhe 138 a seng a. Hetah hian sawhthing man ni lo, administrative cost, transportation cost leh operational cost atana senso cheng vaibelchhe 3.2 (Rs 3,23,76,607) a tel a ni.
Sawrkarin sawhthing a lei zawng zawng kha, December ni 12, 2025 thleng khan quintal nuai 3.437 a ni a, sawhthing a leite hi sawrkar chuan a hralh leh vek tawh a, chuta tanga pawisa hmuh zat chu Rs 12,78,07,290 (Vbc 12.7) a ni. Sawrkarin sawhthing a lei zingah hralh tlak loh tam tak a awm bawk a, chutiang hralh tlak loh quintal 2,386 chu paih a ni bawk.
Sawrkar hian secondary collection centre-ah sawhthing hi kg khat Rs 50 zelin a lei a, sawhthing leisa te hi auction notice siamin hralh chhuah leh nghal a ni a, hralh chhuahna rate hi Rs 10-30 vel a ni. Heta tanga lo lang thei mai chu, state pawn lam mi, Vai sumdawng, Mizoram sawhthing lei thinte tan chuan, sawrkar auction sawhthing lo chan mai hi a finthlak dawn hle, tih hi a ni. Tunhmaa Kg khat Rs 100 chuanga an lei thin kha, sawrkarin support price a siam hnuah, Kg khat, a to berah pawh Rs 30-in, hmun khata phurh khawm sa diam tawh lehnghal chu, awlsam leh nuamsa takin, an lo lei zar zar thei dawn tihna a ni.
Zawhna awm thei ta chu: Sawrkar hian, hun tam tak seng chungin, tha leh zung tam tak leh sum tam tak hloh chungin, Vai sumdawngten man tlawm, awlsam leh nuamsa taka an lei theih turin sawhthing hi a sawngbawl, tihna a ni thei mai lo maw?
Chhungkaw rual deuh hian huan an siam a, pa ber chuan a fate thawhchhuah sa chu chhungkaw pawisain a leisak a, a leina aia tlawmin a hralh leh a, an phur tlang em em mai a. Nakumah chuan a aia tam thlai ching ang u, an ti a. A kum lehah chuan a hma aiin an tharchhuak hnem zawk a, a ngaite bawkin, chhungkaw thawhchhuahsa sumin a fate thlaithar chhuah chu pa ber chuan a leisak leh a, a aia tlawmin a hralh leh a… Chutiang vel chu kan ni thei mai lo maw?