Sawhthing Crisis

Han ti hluai ila, tuna Mizoramin sawhthing kan buaipui dan dinhmun mek hi chu ‘harsatna chin fel harsa leh chinfel theih loh’ pawh a la ni chiah lo va, chinfel tuma hmalakna kal mek a nih avangin ‘crisis’ han tih em atan chuan a la hma deuh mai thei e.
Sawhthing chingtu thenkhatin support price kaltlanga an tihral mek laiin tam tak erawhin an sawhthing chawh sa tihralna an hmu mai lo a. Sawrkarin support price kaltlanga leisak a tumna kawng lah an la zawh fuh ve thei chiah si lo; an sawhthing a cher tawlh tawlh a, a buk a zang chho zel a, an la tiral thei bawk si lo chu an mangang tawh a ni ber mai.
Kumina sawhthing thar chhuah tur hi quintal nuai 10 vel ni turin sawrkar chuan a chhut a. Chiang faka hriat theih chinah, thla hnih (20 Feb-20 April) chhung khan sawrkarin sawhthing quintal 72,003 a lei tawh a; hemi hnu lamah pawh lei leh nual tawh mah se, a fik a fak hriat tur a la awm mai loh avangin data awm sa atanga kan chhut chuan, sawhthing thar chhuak tur atanga tuna sawhthing lei tawh zat chu 7.2% vel chauh tihna a ni.
Sawrkar lam hian sawhthing leina pawisa a awm tawh lo a ti dawt lova, a dahkhawlna lamah zawk harsatna a awm niin sawi a ni a. Sawhthing quintal nuai 10 vel thar chhuak tura chhut a nih lai leh, ‘kan lei vek ang’ tih ni si, a dahkhawlna neih that tawk loh avanga hralh thawl hun nghak titih deuha kan awm leh si a nih chuan, thil reng reng hi ruahman lawkna a thui lovin, ‘a tlachawp’ chet deuh riau hian a lang a. Kum khat leh a chanve tep chhung hian, sawhthing dahkhawlna tur eng emawzat chu sak hman awm tak a ni a, mahse sawhthing lei lai chawlhsan ngai khawpin a dahkhawlna lamah kan buai niin a lang.
Tuna chawh sa tihral hun nghak mekte hian an eizawnna ngai sawhthing bawk an buaipui leh dawn a nih chuan, sawhthing hmun siam ngai bawk, chawhsa tihralna tur ngaihtuah ngai bawk, an tan a buaithlak dan tur chu sawifiah vak ngai chuang lova hriat thiam theih a ni.
Sawhthing hi tuna sawrkar hian a tlinpui niin a lang a, sawhthing bawk hi a tlakpui leh mai loh nan beihpui thlaka a thlurbing deuh te pawh a pawimawh awm asin.