Sawhthing lei hi an intiamna a ni – PC president

Sawhthing lei tum dan chungchanga ZPM sawrkar aiawhte thu sawi dan chu inthlan campaign laia an sawi dan nen a inang lo tih PC president Vanlalruata chuan a sawi a. Sawhthing lei chu mipuia an intiam a nih avangin sawhthing lei tum chungchang ngaihtuah nawn turin an ngen tih a sawi.
Zirtawpnia an party office-a inkhawmah PC president chuan, sawrkar thuchhuak anga ngaih theiha tunhnaia sawhthing lei tum dan lo darh chuan mipui a barakhaihin a thawng a, mi tam tak rilru a tina tih a sawi.
“Sawhthing hralhna tur, research pawh nei fel vek tawha an insawi vangin mi tam takin an ching a. Chu’ng mite chuan hralhna tur dang a awm loh pawhin sawrkarin a leisak turah an ngai. Chu chu campaign-naa an intiam dan, video footage tam tak awm a ni,” a ti.
Adviser to CM KC Malsawmzauva’n sawhthing zawng zawng sawrkar lei tir tumna rilru put chu corruption anga a sawi thu sawi chhawngin Vanlalruata chuan, “Sawrkarin sawhthing a lei vek dawn nia ngaih hi corruption a ni lo. Party mi duhsak zawng hlawh pek theihna tura nihna an pek chawpte, dan pawngsuala contract leh supply hna an inpe chiamte hi corruption chu a ni zawk,” a ti a. Hetiang thu chuangtlai sawi chu pawi a tih thu a sawi.
Sawhthing lei chu an intiamna leh mipuiin vote an pek chhan lian ber pakhat a nih avangin ZPM kaihhruai sawrkarin tihhlawhtlin a ba tih PC hruaitu hian a sawi a. “Research nei lawk anga an insawi kha a dik loh zia a lang chiang telh telh. Chumai ni loin, tun thlengin sawhthing hralhna tur an la hre lo hi mipui tan a pawi a ni,” tiin, sawhthing chungchanga thutlukna ennawn a, mipui tan hma la thuai turin sawrkar a ngen tih a sawi a ni.