Ruah a tla tan a, sawhthing chawhna hun a awm tawh mang loh avangin, an intiam angin lei sak thuai thuai turin sawrkar an phut tih Congress hruaitu Dr Lalmalsawma chuan a sawi.
MPCC treasurer Dr Lalmalsawma hian Sairang FCI kudam-a sawrkarin sawhthing a lei khawmsa a dah chu a hmunah a en a. Sawrkarin sawhthing chingtute a lainat tak tak a nih chuan leisak turin sum an ruahman thei tih an hria tih sawiin, “Congress sawrkar a intiamnaa nghet taka a ding thin ang khan, ZPM sawrkar pawh ding turin kan phut a ni,” a ti.
Sawhthing chingtute an mangang tawh hle a. Khaw tam takah sawhthing chawh sa an dah nghek nghuk a, hralhna a awm loh avangin an chawh belh ngam tawh loa, chawh lohin ramah a tam zawk a la awm niin a sawi. Sawhthing hralhna hun a tlem telh telh a, kuthnathawktuten thlawhhma an lak a ngai nen, sawrkar a chet thuai a ngai tih a sawi bawk
ZPM sawrkarin SEDP sum bang atangin thlaithar leinan cheng vaibelchhe 110 an dah tih an sawi bakah 2024- 2025 budget-ah Bana Kaih Policy atan vbch. 200 dah a ni a. 2025- 2026 ah Bana Kaihna atan vbch.350 dah leh a ni tih MPCC treasurer hian a sawi.
“RTI chhannaa a lan danin, sawrkarin sawhthing leinan vbch. 38.2 vel chauh a la seng. Ruah a tla tan tawh a, sawhthing chawhna hun a awm tawh mang lo. A bo a bang awm loin a sumfaia lei sak nghal turin kan phut a ni,” a ti.
Sairang FCI kudam pawh vawiin thlengin lak khawm sa pawh hralh chhuah lohin kudam-ah a la khat vek a. Sawhthing dah sa tam tak an ro tan a, tam takin buara chhungah zung an thlak tan mek a. District hrang hranga collection centre dinhmun pawh Sairang FCI Kudam dinhmun ang tho an ni tih an hre lehzel tih a sawi bawk.
Sawhthing lei sak thuai thuai turin sawrkar phut
Get real time updates directly on you device, subscribe now.