Sawhthing leina nuai 5000 Hralhnaa hmuh let nuai 600

District Agriculture Marketing Board hrang hrangin sawhthing leina atan an sum hman belhkhawm chu cheng nuai 5808 chuang a ni tawh a, quintal nuai 1.13 chuang an lei tawh. Sawhthing lei khawm sa hralhna atanga sum hmuh let chu nuai 634 chuang a ni thung. Mizoram Agriculture Marketing Board (MAMB) chhinchhiah danin, sawrkarin thlai lei tur pali a ruahman bik atan MAMB-ah cheng vaibelchhe 62.599 a dah a. MAMB hian sawrkarah vbch. 20 a dil belh mek. DAMC lamin tun thlengin sawhthing leina atan Rs. 58,08,00,100 an pechhuak tawh a. Sawhthing lei tawh zat chu quintal 1,13,627 niin, a then direct purchase, a then support price hmanga lei an ni.
Sawhthing lei khawm sa an hralh lehna atangin MAMB hian Rs. 6,34,63,875 a hmu let tawh thung.
Thawhlehni khan chief minister Lalduhoma hoin sawhthing slice dry kalpui mek sawiho a ni a. Hemi atan hian MAMB chuan local entreprenuer 13 a thawhpui. Chak zawka kal ho dan leh an inbunna tur zar pharh dan sawi a ni
Mizorama processing unit din duh, India ram chhung leh ram pawn firm 6 chungchang sawi a ni a. Heng firm mamawh, an inbun duhna hmun hriat a, a tul anga hma lak an rel. A umzuitu tur bik Committee an siam nghal bawk.