Sawhthing quintal nuai 1.26 lei tawh

Mizoram sorkarin sawhthing a lei mek a, May ni 7 thleng khan quintal 1,26,761.4818 lei a ni tawh. A kg zawng chuan hei hi kg 1,26,76,148.18 a ni.
Mizoram Agriculture Marketing Board (MAMB) lamin sawhthing lei leh hralh hi an buaipui a, a thartute hnena leitu tak hi chu MAMB ni lovin, sawthing hmanga sumdawngte an ni.
Sumdawngte’n an leina rate hi a inang lo thluah a, kg-a Rs 50 a tlin lohna kha MAMB hian an lo tum a ni. Chuvangin, kum hmasa lam angin MAMB kuta kudam-a dah khawl vak vak ang kha kuminah a awm lo tih thu dawn a ni.
A leitute’na sawhthing an leina man hi a inang lo thluah a, May ni 7-a MAMB te’n an chhinchhiahnaa a lan dan chuan, a lei to berin kg-ah Rs 33-in an lei. Kg-a Rs 32-a lei te, Rs 31-a lei te an awm a, a lei tlawm ber chuan kg-ah Rs 16-in an lei. Rs 17-a lei an awm a, Rs 18-a lei te, Rs 20-a lei te, Rs 21-a lei te, Rs 22-a lei te, Rs 23-a leite pawh an awm.
May ni 7 thlenga an chhinchhiah danin, sawhthing hi bag 3,42,575 lei/hralh a ni tawh a, chu chu kg 1,26,76,148.18 niin, a man hi belhkhawmin Rs 32,23,58,360.64 a ni.
Sawhthing lei hna hi February ni 9-ah an thawk tan a, May thla tawp thleng lei tum a nih thu MAMB hotute chuan an sawi.