Sawhthingah chuan MNF lehCongress-in sawi tur an nei lo
- ZPM thupuangtu
ZPM sawrkar hnuaia sawhthing an lei sak an dah tawih zat pawh an sawrkar chhung zawngin MNF leh Congress-in sawhthing an lei sak loh avangin, sawi ve tur an nei lo tih ZPM thupuangtu chuan a sawi.
ZPM thupuangtu K Laltluangkima chuan, Congress thupuangtu in Sairanga sawhthing lei khawlsa dahna hmun a tlawh tuma sawhthing dah tawih a tih ho chu hralh tlak leh hralh tlak loh thliarna lama tha lo zual paih an ni tih a sawi.
“Thlai thar hi sawngbawl an ngai a, loneituten a chhia leh a tha an dah pawlh chuan lo thenfai a ngai thin. Congress-in sawhthing ngaihvena an pen chhuak ve ta hi a lawmawm a. An thusawi lar tak thin – ‘In sawhthing hi ching rawh pawh kan ti loa, leisak che u kan ba lo’ tih kha a ni. ZPM sawrkar-in thiam ang angin loneitute tanghma ngai in kan buaipui nawk nawk a, sawhthing ngaihsak ngai lo party-te pawh kan kai harh ta a, a lawmawm hle,” a ti.
Congress leh MNF chu sawhthing lei chungchanga ZPM tih dan sawisel ngawt loin, an sawrkar ve huna an tih dan tur tha sawi zawk se, loneitute tan ngaihthlak a hahdam a ring tih K Laltluangkima hian a sawi. “Kum 17 leh kum 20 an sawrkar chhung khan sawhthing tawih kan paih zat pawh hi an lei lo,” a ti.
An duhthusam an thleng lo nain, loneitute hlim zia an hmuh hian, a zawngchhang thlak dawn hlein an hria tih a sawi a. Mi pakhatin kum khat chhunga nuai 2, 3, 5, 8, nuai 10 an lalut chu, NLUP leh SEDP kum 5 chhunga sing hnih emaw nuai khat emaw hmu te chu an awh loh hmel hle tih a sawi a ni.
BJP Mizoram president-in Mizoram Universal Health Care Scheme (MUHCS) laimu atan ABPMJAY hmang anga a sawi chungchangah ZPM thupuangtu chuan, a laimu niloin a zar peng zawk a ni a, MUHCS chu a kungpui zawk a ni tih a sawi.
“Golden card nei tan a thlawna inentir theihna leh in admit theihna hospital a tlem a; tunah chuan ABPMJAY hnuai amite kha a thlawn vekin a huam tizau zawk MUHCS hnuaiah pawm nghal an ni a, insurance danga inziah luh a ngai tawh lo,” a ti.
Private hospital hoin MUHCS zawm zel turah ngaih a nih rualin, an zawm zung zung lo chu Pathian remruat zawk nia a hriat thu a sawi a. Private hospital lian leh changtlung zawkten an la zawm loh vang tak hian sawrkar damdawi in hoin nasa takin hma an sawn phah tih a sawi a ni.