Sawhthingin leilung a tih chhiat dan zirtu team din

Sawhthingin leilung a tih
chhiat dan zirtu team din
Sawhthingin ram leilung a tih chhiat dan zir tur sawrkarin team a din tih chief minister Lalduhoma chuan a sawi.
Chief minister chuan sawhthingin leilung a tihchhiat dan zirtu team din a ni a, permanent farming zawnga kalpui tura ruahman mek a ni tih a sawi. Hetihlai hian sawrkar intiamna anga kuthnathawktute atanga sawhthing an lei chu quintal 348066 a ni a, sawhthing bikah hian sawrkarin sum a sen tur chu cheng vaibelchhe 142 chuang a ni tih a sawi. Hmun li (4) ah sawhthing sawngbawlna hmun din an tum ma. ‘Rapchung Technology’ hnuaiah Pu Lalzuimawia’n thing hmanga sawhthing ur rona khawl a siam chu tha hle dawnin sawrkarin a hria tih a sawi a ni.
Thil panga – hmuhphiah, aieng, Mizo hmarchate, buhhum leh sawhthing lei a ni a. Mizo hmarcha lei leh hralhah harsa a awm loa, aieng hi quintals 400-ah support price pek niin buhhum quintal 1472 lei a ni a; hmunphiah quintal 40327 lei niin, farmer-ten grade A leh B a then an ti hleithei loa, nakum atang chuan grading loin a pulunga leisak an ni dawn tih chief minister hian a sawi.
CM Rubber Mission hnuaiah phase 1 atan rubber chinna hmun thar hectare 1000 leh phase 2 atan hectare 2000 a zau ruahman a ni a. Zau (cluster) hrang hrang tan a hnaina khawl 100 pek an ni dawn tih a sawi. “Inter-cropping uar zel a ni anga, rubber hmunah khuai khawi kalpui tel a ni ang. Organic farming hi uar telh telh tum a ni bawk,” a ti.
Bana Kaih loan component hnuaiah progress partners 646 thlan niin, mi 125 hnenah loan pek an ni tawh tih a sawi a. CM Special Package hnuaiah progress partners 2257 thlan niin, hemi atan bik hian cheng vaibelchhe 18.35 dah a ni tih a sawi a ni.
“Bana Kaih thawh hnihna atang chuan innghak khawm tawh loin, loan leh special package hi englai pawhin a dil theih reng tawh anga, pek tlak chu pek nghal zel an ni ang,” chief minister hian a ti.