Sawihona

Kar kalta Zirtawpni khan State Institute for Transformation leh Mizoram University tangkawp chuan thupui pawimawh tak, “Moving Towards Green and Net-Zero Building Practices” tih zirhona hun an hmang a.
He zirhona buatsaih a nih chhan hi, India-in Sustainable Development Goals (SDGs) tihlawhtling tura a intiamna hlenchhuahna kawnga rahbi pawimawh tak a nih rualin, Mizoram sawrkar pawh India rama bet a nih angin he intiamnaah hian a tel ve nghal a, kan chhehvel boruak leh leilung ti chhe lo thei ang bera hmalak a intiam ve nghal tihna a ni a, a pawimawh hle.
He hun hmanpuitu MZU Vice Chancellor chuan, hmasawnna ruhrel kan din dawnin kan chhehvel boruak leh leilung a ti chhe thei em, kawlphetha hman tam loh dan tura din a ni em tih leh, nizung chakna a tam thei ang berin hman tangkai theih a ni dawn em, tih te chhhut lawk a pawimawh, tiin a sawi bawk.
Hmasawnna rahbi han rah dawn hian, tunhma kum 100 vel kalta a, hma lam hun ngaihtuah lek lova kalpui pawp pawp ang kha, a ni ngawt thei tawh lova, khawvel huapa ngaihtuahna sen a ngai ta zel mai a ni.
Khawvel boruak lum chho zel (global warming) hi khawvel hmun hrang hranga hmasawnna hna thawhin a nghawng belhkhawm avanga lo awm a ni a. ‘Keini chu kan awmna a kilkhawr em a, a nghawng pha ve lo ang’ tih ngawt theih a ni tawh lo.
Khawvela mithiamten an chhut dan chuan kan chenna khawvel lum belh zel tur hi kan dan loh chuan kum 2050-ah chuan khawvel lumna temparature hi 20C velin a sang chho tawh dawn, an ti a. Boruak lum zel awmtirtu zingah hmasawnna ruhrel din (building sector) hi a thawh hlawk pawl a ni a, khawvela carbon insiam chhuak (carbon emissions) 38% hi building sector avanga awm a ni, tiin mithiamte chuan an chhut a ni.
Building sector hi ‘Green’ nen hian a inkungkaih tlat a, hei hi Mizoramah chuan ngaihtuah ngun a ngai ta. Hmasawnna ruhrel lian kan din dawn apianga kan tihchhiat tel ngei ngei chu nunna hnar Green (Ramngaw) hi a ni, sawifiah vak a tul tawh lo, kan hrechiang tawh lutuk.
Thil pawimawh tak sawiho thin hi eng ang taka bawhzui leh tihhlawhtlin nge a nih thin tih thlenga kan umzui zel pawh a pawimawh nghal. Sawiho ringawtah hian kan tawp leh mai ang tih a hlauhawm. Tuna thupui pawimawh tak hi a kaihhnawih department ten an vawn tel reng a pawimawh dawn a ni.