Sawiselna a awm hnuah Nepal home minister a bâng

Sawiselna a awm hnuah Nepal home minister a bâng
Nepal-a home affairs minister chu a investment tih leh thil dangah a lakah zawhna a awm nia sawiin a bâng a. Thla khat chauhva upa an ram sorkara minister nihna kalsan pahnihna a ni der.
Sudan Gurung-a chuan Nilaini khan a chanvo chelh a kalsan tur thu a puang a, zawhna awmte chu chhui chian a ngai tih a sawi a, a bak thil dang a sawi lo.
Kum 38 mi hian a social media account-ah, “Vawiin atang hian home minister nihna atangin ka bâng a ni,” a ti.
“Kei atan chuan dinhmun aiin nungchang hi a ropui zawk a, mipui rinna aia thiltihtheihna lian zawk a awm lo… Mipui nun a thianghlim tur a ni a, hruaitute chu chhiar ngam an ni tur a ni,” tiin March 27-a thuneihna changtu, Gurung-a chuan a sawi belh bawk.
Prime Minister Balendra Shah-a press adviser, Dipa Dahal-a pawhin Gurung-a bânna thehluh chu pawm a nih thu a sawi a. Shah-a’n home affairs ministry hi a enkawltu tur mi thar a ruat hma a chang dawn tih a sawi bawk.
Gurung-a hi nikum September thlaa thalai kaihhruaina hnuaia lungawi lohna lantir a nih laiin lungawi lote laka an chet dan chhui leh a hnua prime minister hlui, KP Sharma Oli leh a home minister, Ramesh Lekhak-a te man tura thupek a chhuah hnuah ngaihven a hlawh hle.
Rapper atanga politician ni ta, kum 35 mi, Shah-a hi kum thuma upa, Rastriya Swatantra Party (RSP) hruaitu niin ⁠eirukna thunun, rorelna tha leh langtlang taka thil kalpui tiamin thla hmasaa parliament inthlanpuia hnehna an chan hnuah prime minister a ni.
Kum thum chhung Nepal khawpui, Kathmandu mayor a nih chhung khan Shah-a hian a siam thatna kawngah mipuiah a lar hle.
Thla tir lam khan sorkar chuan politician leh official-te thil neih chhui chiang turin Supreme Court judge hlui kaihhruaina member panga awmna commission a din.
Commission din hi Shah-a’n thuneihna a chan hnua sorkarin point 100 awmna insiam thatna tur tih tur a siam zinga tel a ni.
Shah-a hian tun thla tir lam khan a labour minister chu a bân a, RSP chuan Dipak Kumar Sah-a hian a nupui chu an rama Health Insurance Board board of directors member atana ruat a nih theih nana hma lain ‘a dinhmun zahawmna’ a hmang dik lo niin an sawi a ni.
Nepal hi Transparency International-in Corruption Perceptions Index a siamah ram 180 zingah 109-na a ni.