Sawrkar aiawh leh kohhran aiawhten ruihhlo an zirho

Mizoram State AIDS Control Society (MSACS) chuan damdawi hmansual kaihhnawiha hriat tur inhrilhin Ningani khan seminar an buatsaih a. Doctor, Police, Excise & Narcotics, MSD&RB, Food & Drugs Administration, Samaritan Society leh kohhran hrang hrang aiawh an tel.
Hmanpuitu Health & Family Welfare minister Lalrinpuii chuan ruihhlo tel lo Mizoram kan neih theihnan ruihhlo lut tur ven, ruihhlo hmangtu titlem tura hma lak leh ruihhlo nghawng tha lo siamthat chu sawt zawka thawk turin department tanrualna pawimawh tih a sawi a. World Health Organisation chuan ruihhlo ngawl veina hi natna tih dam theih a ni a tih angin, he natna tidam tur hian mithiam rawn nachang hriat a tul tih a sawi a ni.
SHALOM chief executive officer Dr Chawnglungmuana chuan ram danpui Article 47 leh The Narcotic Drugs and Psychotropic Substances Act 1985-ah ruihhlo do chu mitin mawhphurhna a ni tih tarlan a nih thu a sawi a. Tunlaiah school naupang zingah ruihhlo ngai an awm tih sawiin, ruihhlo ti lo tura inzirtir kawngah hma lak nasat a ngai tih a sawi.
MSACS project director Dr Jane R Ralte chuan ruihhloa inchiu thinten natna hrang hrang an inkaichhawn lohnan leh an hriselna nghawng chhe chak lutuk tur ven kawngah MSACS chuan Opioid Substitution Therapy (OST), condom hman sawi uar leh hriau hluia a thar thleng an kalpui thin tih a sawi.
OST hi ruihhlo chak na laka chhawktu damdawi a ni tih sawiin, OST tha taka an lak avanga lehkha zir chhunzawm thei, pangngai taka hna thawk chhunzawm thei leh mi hmantlak ni leh thei hial an awm tih a sawi. MSACS hnuaiah ruihhlo ngaite tan targeted intervention project 30 leh link worker scheme project 8 an kalpui tih a sawi bawk.
Seminar-ah hian mithiamten ruihhlo do leh ruihhlo ngaite enkawl dan thupui hrang hrang hmangin an zirtir a ni