Sawrkar hnathawk tam zawkin thil tha an duh – DP&AR minister

Sawrkar hnathawk zingah a tam zawk chu thil tha duh leh thahnemngai tak an awm nia a hriat thu Department of Personnel and Administrative Reforms minister K Sapdanga chuan a sawi.
Aizawla Mizoram Departmental Officers’ Association (MDOA) general assembly a hmanpuinaah DP&AR minister chuan sawrkar hnathawk zingah a tam zawk thil tha duh leh thahnemngai tak an awm nia a hriat thu sawiin, dan hnuaiah zel sawrkar hnathawkte dinhmun leh hamthatnate bawhzui tum a ni tih a sawi.
Sawrkar pachhiat zia hretute theuh an nih angin khawsak phung an siamrem thiam a ngai dawn, tiin, sawrkar hnathawkte chu dan lalna ram, hnathawhnaa rinawmna lantirna leh inrelbawlna tha siam a nih theih nana hotute tawiawmtu nih tum turin a sawm.
Sawrkar kalsual tur venpui tur leh thurawn pek a tul chang pawha inthlahrung loa pe zel turin K Sapdanga hian sawrkar hnathawkte a chah a. A enkawl Home department atanga bul tanin, department dangte tana entawntlak ni tura inthuahfai mek a ni tih sawiin, “February thla chhunga a nih ang tur tak ni pha thei tura lungrual taka tan lak tlan a ni a. Department hrang hrangah inrenchemna leh dan hnuaia hma lak a nih theih nan tan lak a ni bawk,” a ti.
MDOA hi kum 1983 a din niin, kum 2003 ah sawrkar recognition a hmu a. Tunah hian department 31 atangin gazetted officer association member 500 chuang an awm a ni.