Sawrkar hnathawkte

Sawrkar hnathawkte intuaihriamna tura hmalakna kal zelah, nimin khan Mizoram sawrkar, Capacity Building Commission leh Karmayogi Bharat (SPV) ten thawh hona thuthlung an ziak a. Capacity Building Commission hian policy duan leh sawrkar kaihhruai hna an thawk ang a; Karmayogi Bharat (SPV) ten technical leh digital lam enkawlin iGOT Platform an vil dawn a ni awm e.
Mizoram sawrkar hnathawkte hian intuaihriam an mamawh ta viau a ni phawt ang a. Thawhhona tur hi thil tangkai leh tha tak a ni ang tih a rin theih a, kan sawrkar hnathawkten fel zawk, rang zawk leh phuisui zawkin mipui rawng an bawl thei tawh turah kan ngai ang; he lam chu lo dah tha ta ila.
Sawrkar hnathawkte hi ‘government servants’ tia sawi an ni thin a, Mizo tawng chuan ‘chhiahhlawh’ emaw ‘tirhkah’ emaw pawh a tih theih mai awm e. Kan hria a, mi thenkhat chuan an ina hna thawk turin midang an ruai a, chu chu ‘awmpui’ (domestic worker) kan ti mai thin a. A nihna takah chuan ‘tirh-kah’ an ni ber. Inchhungkhur hna hrang hrang an thawk a, a ruaituin thla tin hlawh a pe a, chubakah chuan hamthatna dang (benefits &allowances) —ei leh in, chenna etc. a thlawnin a pe bawk. ‘Awmpui’ hian a tihtur a hlenchhuah that loh a, a inthlahdah a, a thawk tha lo a nih chuan a ruaituin a bantir thei thin.
Sawrkar hnathawkte pawh hi mipui rawngbawl tura thawk an ni a, an thawh hlawh pawh sawrkar (mipui)-in tha tawk tak a pe a, hamthatna dang tam tak (benefits & allowances) a vur belh bawk a; ‘Awmpui’ dinhmun nen khaikhin a remchang viau awm e.
Sawrkar hnathawkte tihtur leh mawhphurhna chu ram leh mipui hmasawnna tura thawh a ni. Ram leh mipui dinhmun a hniam viau hian ram hruaitu (politician)-te hian kawh-rawn an hlawh thin a, mawhphurhna latu tur an nih miau avangin. A nihna takah chuan, sawrkar hnathawkte hi an hnathawhna tur mila thiamna bik hrang hrang nei infawkkhawm an ni a, ram leh hnam hmasawnna tur leh thatna tura an zir thiamna leh finnate hmang tur an ni. Ram hruaitu (politician) ten vision an nei chau viau emaw, an pamham viau emaw pawh ni se, India Constitution-in a phuarna hnuaia dik tak leh rinawm taka thawk tura intiam sawrkar hnathawkte hian a ‘steering’ chelhtu dik tak zawk an ni tih an inhriat a, chumi nihna (spirit) hmanga an mawhphurhna an hlenchhuah ngam a pawimawh hle. Ram hruaituten dik lo taka thil an ti thei a nih chuan sawrkar hnathawkte pawhin ‘dik lo’ chu an thlawp (support) tihna tluk a ni. Sawrkar hnathawkte an rinawm a, an huaisen phawt chuan ram a changkang ngei ngei thin.