Sawrkar hnathawkte intuaihriamna tur ruahmanna siamin thawhho tum

Sawrkar hnathawkte intuaihriamna
tur ruahmanna siamin thawhho tum
Mission Karmayogi – National Programme for Civil Services Capacity Building (NPCSCB) hnuaia sawrkar hnathawkte intuaihriamna atana hmalakna kalzelah, Mizoram sawrkar leh Capacity Building Commission (CBC) leh Karmayogi Bharat (SPV) chuan Nilaini khan Aizawlah thawhhona thuthlung an ziak
Mizoram sawrkar aiawhin DP&AR (Good Governance & Training Wing) secretary YLN Reddy, CBC aiawhin secretary Shyama Prasad Roy leh Karmayogi Bharat (SPV) aiawhin CEO Chhavi Bharadwaj ten MoU-ah hian hming an ziahhnan a. Mizoram sawrkar department hrang hrang hotu, secretary rual leh hotu dangte telin, Mission Karmayogi chungchang zirho nghal a ni.
Chief secretary Khilli Ram Meena chuan Mission Karmayogi thil tum tlangpui a sawi a. Sawrkar hnathawkten an chanvo leh an mawhphurhna, danin a phut vang mai ni loa, rinawmna, dikna leh thathona nen an hlen theihnana hmalakna a ni a, hriatna leh thiamna piah lama inpekna thinlung nena hna an thawh theihnan, hun inher danglam zel leh tunlai thiamna technology chhuak thar mil zela an inherrem ve zel theihnan leh kawng hrang hranga an thiamna leh theihna tih hmasawnna tur a ni tih a sawi.
He MoU hnuaiah hian CBC-in policy duan leh sawrkar kaihhruai hna an thawk anga; Karmayogi Bharat (SPV) in technical leh digital lam enkawlin iGOT Platform an vil ang. Mizoram sawrkar nen tanghoin, tunlai mil zelin Capacity Building & Training Plan duan a ni anga, Mizoram sawrkar hnathawkte tan intuaihriamna programme duangin, chin dan tha zawk leh mamawh hmanrua inphuhru tawn zelin, online-a training theihna iGOT Karmayogi Platform-ah department hrang hrang leh sawrkar hnathawkte telh an ni. iGOT kaltlang hian competency passbook, integrated digital certificate pek thin an ni dawn a ni.
He thawhhona hian sawrkar inrelbawlna tha zawk leh chak zawk, mipui leh sawkar inkara inkungkaihna tha zawk leh mi te berte thleng phak sawrkarna tha a thlen zel beisei a ni.