Sawrkar hnathawkte leh sawrkar

Sawrkar hna thawkte hi sawrkar tha siamna atana hmanraw pawimawh an ni a, tha taka hna thawk thei turin tun lai hmasawnna mila intah hriam reng a tul, tiin Lunglei district bawrhsap Pi Navneet Mann-i chuan tun hnai khan a sawi a. He thu hi, chhim lam district pali-a sawrkar hnathawkte puala office inenkawl dan leh sum vawn dan zir hona hun a hmanpuinaah a sawi a ni.
Sawrkarna fawng chelhtuten ram leh hnam hmasawnna tur ruahmanna (policy/programme) hrang hrang an duang a, chumi zulzui chuan sawrkar hnathawk kan tihte hian an thawk ta thin a. Ruahmanna tha tak pawh awm se, a thawktu ber ‘sawrkar hnathawkte’ hian an thawh that loh emaw, an thawh thiam mang loh emaw tlat chuan, sawrkar tha a awm thei dawn lo tihna a ni. Chumi awmzia chu, hmasawnna leh ram hnufualna chu sawrkar hnathawkte thawh that leh thawh that lohah emaw, thawh thiam leh thawh thiam lohah emaw a innghat tlat, tihna a ni. Chuvangin, sawrkar hnathawkte hi an intuaihriam ve reng a pawimawh takzet a ni.
Inthlang ramah chuan kum nga dan lek lekah sawrkar a inthlak kual thin a, sawrkar hnathawkte hi chu an inthlak ve sek lo, pension awmzia kan hria. Chutih laiin, sawrkar chak leh sawrkar chak lo tih emaw; sawrkar tha leh sawrkar tha lo tih emaw hi a ri zing thin hle bawk. Hetah hian, kum nga dana party kaihhruai sawrkar an inthlak changa ‘chumi party sawrkar chu an chak’ tih emaw, ‘chumi sawrkar chu an chak lo’ tih te, ‘chumi sawrkar chu an tha… chumi sawrkar chu an tha lo’ tih emaw kan sawi thin a, hetianga ‘chak’ leh ‘chak lo’ kan insawi karthlak nawk nawk laia hna thawktu tak takte chu inhtlak ve sek lo sawrkar hnathawk kan tihte hi an ni tlat lawi si a.
Heta tanga lo lang ta chu, sawrkar hnathawkte hian, an hrawn sawrkar azirin hna an thawk thain an thawk tha lo emaw, an thawk chakin an thawk chak lo emaw, an inthlahdahin an inthlah dah lo emaw mai mai dawn tihna a ni ber ta awm e. Chuti a nih chuan, sawrkar hnathawkte hian ram leh hnam tan hian thahnemngaihna an nei tak tak lo tihna em ni ta ang le? Zawngrengtea serthlum huan veng ang lek hi kan ni zo ta mai tihna em ni ang? Huan vengtu ven lehchhawn ngai reng ang mai kan nih chuan, kan ram hian hma a sawn chak thei dawn lo tihna a ni.
Mizoram annual budget hnuhnung ber han en hian, sawrkar hnathawkte hlawh atan leh sawrkar inrelbawlna atana sum ruahman chu 82.54% a ni a, kum dangah pawh hetiang zat deuh thuak hi a ni thin. Headwise expenditure-ah pawh sawrkar hnathawk hlawhin hmun a luah zau ber a, 27.15% a ni. Hetiang zat hi sawrkar hnathawk mi singnga vel hlawh atana ruahman a nih laiin, mipui nuai 13 vel hmasawnna hna thawhna tura ruahman (Infrastructure assets & other capital expenditure) chu 15.08% a ni a. Sawrkar hnathawkte hian mipui hna pawimawh tak tak an thawk kan tih rual hian, hlawh tha tawk tak leh hamthatna hrang hrang dang an la dawng teuh bawk a. Hna an thawh chhan, ram leh hnam, mipui hmasawnna tura theihtawp chhuah hi chu an bat ve a ni. Eng sawrkar pawh hrawn se, dikna leh rinawmna nena an thawh phawt chuan, hetiang ram zim te, mihring pawh tlemte hi chu India rama entawntlak (model state) ni thei turin Mizoram hi an siam thei ang tih a rinawm. Sawrkar hnathawkte han tang sauh sauh teh se.