Sawrkar hnathawkten thawhpui nuam min ti ber – Zodinltuanga

Sawrkar hnathawkten
thawhpui nuam min ti ber
– Zodinltuanga
Sawrkar hnathawk a lian leh a te thlengin Congress sawrkar thawhpui nuam an ti ber tih minister hlui Zodintluanga chuan a sawi.
MPCC adviser Zodintluanga hian Hrangturzo bial khaw hrang hrang a tlawhnaa party mite nen an inkawmnaah sawrkar hnathawkte dikna leh an zahawmna vawnhim sak kawngah Congress sawrkar khan theihtawp a chhuah tih sawiin, “Sawrkar hnathawk, a lian a te ten min hrilh fo chu, in hunlai khan kan zalenin, thawhpui in lo nuam ber’ tih a ni,” a ti.
Congress kum 10 sawrkar chhungin, sawrkar sawisel bo ni bik lo mah se, ram leh hnam rotling sulhnu an ngah hle tih a sawi a. MNF sawrkarin a sawpchhiat vek Tuirial Hydel Project chu Pu Lal Thanhawla’n tharthawhin an sawrkar chhunga hawn a ni tih a sawi.
MNF-in kalpui ngaihna a hriat loh State Referral Hospital chu Pu Lal Thanzara hoa hma la in, doctor zir theihna medical college siam a ni a, kan faten kan kawtkaiah ngei doctor an zir thei tawh tih a sawi bawk.
“NLUP kan sem ang kan ti a, Mizoram pum kan tuam chhuak a, vawiin thlengin rahbi tleu laklawh tawh NLUP hmanga eizawnna ngelnghet nei mi tam tak an awm a ni,” Zodintluanga hian a ti.
Congress sawrkar lai vekin hmarchhak state dang pawhin tihngaihna vak an hriat loh khelmual tha, phul lem chu Aizawlah leh district thenkhatah an phah a. Sport programme pawimawh ‘Catch Them Young’ kalpuiin, khatih laia naupang, infiamna an kalna tur line-a an tuaihriam chu tunah India ramah a ber ber an ni chho fur tawh tih a sawi.
ZPM sawrkar chu anmahni inpuang kher loin puanchhuah dum dum ni lo mah se, mi zawng zawngin an phone ah video leh news hmehchhuah theihin a awm vek tawh a, chumi hmu leh chhiartute chuan ngaihdan an siam tawh dawn tih sawiin, “Congress party-ah bawk mipuiin beiseina lian tak an nghat leh tawh a, Mizoram mipui tana rorelna tha leh hmasawnna thlen turin kan inbuatsaih a ni,” a ti.