Sawrkar hnathawkten ZPM sawrkar an rin loh zia a lang – Lalruatkima

Sawrkar hnathawkten ZPM sawrkar an rin loh zia a lang
– Lalruatkima
Inthlan dawn kuma nawrh thinah tun atangin lungawilohna lantir an awm tan chu sawrkar hnathawkten ZPM sawrkar an rin tawk loh zia a lang tih MNF hruaitu Lalruatkima chuan a sawi.
Kumin village council inthlana Hnahthial district atanga MNF candidate tlingte lawmpui leh chawimawina chu Inrinni khan Hnahthialah neih a ni a. Hmanpuitu MNF treasurer Lalruatkima chuan, ZPM sawrkarin kawng tinrengin sawrkar hnathawkte a vau a, chu chuan nawrhna a hring mek tih a sawi. Inthlan dawn kuma nuar thinte chuan tun atangin lungawiloh an lantir chu thil mak a tling, tiin, hei hian ZPM sawrkar chu sawrkar hnathawkten an rintawk loh zia a lantir tih a sawi a ni.
A hun pangngai ang chuan October 2025 velah village council inthlan buatsaih tur ni mah se, a hun pangngaia inthlan an buatsaih ngam loh avangin chhuanlam tur zawng chawpin inthlan hun thla 6-in ZPM sawrkarin a sawnhma tih sawiin, a hun takah inthlang ni se, ZPM-in VC-ah sawrkarna tih tham an lak a ring lo tih a sawi. Buhfai man a let thawka tih to, petrol leh diesel man tih san, sawhthing, hmuhphiah, hmarcha leh aieng an lei mumal thei lo chu VC inthlan hun an sawn hma chhan a ni tih a sawi bawk.
“Heti chunga Hnahthial district-a VC tam tak kan la thei hi Pathian remruat a ni a, kum 2028-a kan sawrkar lehna tura hma sialtu a nih a rinawm,” MNF hruaitu hian a ti.
MNF sawrkarah mipui an him a, an hlim bawk nia sawiin, buhfai leh gas a hnianghnar a, kawngpui an thuamtha a, ramri issue-ah MNF aia titha an awm lo tih Lalruatkima hian a sawi.”Manipur leh Myanmar raltlan chungchangah MNF sawrkar chuan Home ministry thu a hnial kalh a, a tul chuan kan dodal mai zel. Chu chuan kan ram, hnam leh sakhaw humhimna tura party ding awmchhun a nih zia min hriattir. MNF chuan Zohnahthlakte kan kuangkuah thei vek a, hnam bil ang zawnga inlakhran erawh kan rem ti lo,” a ti.
ZPM sawrkar chu sawrkar hnathawkte vau ching leh pawl dang diriam ching nia puhin, CSS hnuai thawkte nawrh pawh nu leh pa chan chang loin an vau nghal tih a sawi a. Universal Health Care chu private hospital pakhat mahin inremna (MoU) an la sign pui duh loa, sawrkar hnathawk inzawmkhawm pawlin an dodal bawk tih a sawi. Heng inrem lohna awm hi dawhkan khat kila sawifel tum aiin ZPM sawrkar chuan vauna leh tihelna nen, runluih chungin an chawk hnawk zawk niin a sawi bawk.
“MNF sawrkar hnutchhiah cheng vaibelchhe 110 chu thlai thar leinana dahtha nia insawi siin, tunah sawhthing leinan vbch.36 vel chauh an hmang. A la chuang vbch. 74 kha a ranglamin sawhthing leinan hmang se, tunah chuan an chawh sa a ro tan a, a then a chawr a. A hlawk loh hun nghah chhuah kher hi ZPM sawrkar thil tih vanduaithlak tak a ni,” MNF treasurer hian a ti.