Sawrkar kum tharah cheng vbch.900 vel chhuahpui dawn

Sawrkar kum tharah cheng
vbch.900 vel chhuahpui dawn
Vawiin, April 1 hian sawrkar kum thar, 2025- 2026 a intan a; Mizoram sawrkar chuan kumhlui (2024- 2025) atangin cheng vaibelchhe 900 chuang a chhuahpui thei tura ngaih a ni.
Macrh 31 khan sawrkar kum kal mek (2024- 2025) a liam a. Sawrkar chawlh ni mah se, treasury office chuan dan pangngaiin an hna an thawh a ngai a ni. Finance changtu chief minister Lalduhoma chuan Aizawl Treasury office pahnih – North leh South tlawhin sawrkar kum kharna hi a telpui a. Finance commissioner Vanlaldina Fanai, Finance secretary Ramchuana leh Finance department hotu dangte an awm bawk.
“Sawrkar kum khar a lo hun leh ta a, Finance department-a thawktute, kan Treasury office hrang hranga thawktute zarah engkim felfai takin kan inchingfel thei hi ka lawm hle a ni. Kuminah hian cheng vaibelchhe 900 chuang hret kan chhuahpui dawn. Nikumah khan vbch. 500 vel kan chhuahpui thung. Hei hian kan sum dinhmun a lo that deuh deuh zia a tilang a ni,” chief minister hian a ti.
March 31-a sawrkar kum tawp nia Mizoram sawrkar sum chhuahpui zat dik tak hi vawiin (April 1) ah a chiang tura ngaih a ni a. Vaibelchhe 900 a chuang tura ngaih a ni tih Finance hotute chuan an sawi. Heti hian pension charge lut sa zawng zawng pek fel hman a ni a, GPF pawh a lut ang ang pek fel vek niin, medical bill pawh a lut chin chu pek vek a ni. 2023- 2024 kum tawpah khan vbch. 500 vel chhuahpui a ni tih an sawi bawk.