Sawrkar laipui puihna hmanga loneitute puih an nih dan thlirlet

Champhai District Level Monitoring Committee (D-MC) for Central Sector Scheme (CSS) ‘Formation and Promotion of 10000 Farmer Producer Organisations (FPOs)’ chu an chairman, bawrhsap James Lalrinchhana kaihhruaiin Thawhlehni khan an thukhawm a. Hmalakna hrang hrang thlirletin district tana scheme kalpui dan tura hmachhawp an sawiho.
Chairman chuan CSS for Formation and Promotion of 10000 FPOs chu FPO hlawhtling tak leh mahni kutkea ding thei siam tura tanpuitu leh thiamna petu a ni, tiin, thil tharchhuah hralhna leh credit linkage duhkhawp siam kawnga hma laksaktu a ni a. He scheme hian sum lakluhna kawngah loneitute a puih dawn bakah khawtlang hmasawnna leh district chhunga agriculture sector-a innghat kuthnathawktute tan hamthatna a siam a beisei tih a sawi a ni.
NEIDA district coordinator SC Ramnunmawia chuan baseline survey leh report hrang hrang a sawi a. NEIDA FPO hnuaiah Champhai district-a apple chingtu mi 220, Mizoram Cooperative Societies Act hnuaia inziaklutten share capital cheng nuai 2.200 an thawkchhuak a, an share collection atangin equity fund dawng tura rawtna siam a ni. Business plan, training kalpui dan tur, khaw 4 thlanchhuaha loneitute awareness leh capacity building leh fund dawn leh hman dan tur a thehlut nghal. Chhaktiang FPC CEO Lalremruata chuan Clover Organic Pvt. Ltd. hmalakna powerpoint presentation hmangin a sawifiah bawk.