Sawrkar leh MCVU

Mizoram sawrkar chuan September ni 1 atangin petrol leh diesel man Rs 4 ve vein a tisang a. Taxation minister-in tuialhthei man tihsan chhan a sawifiah dan chuan, Rs 2 chu social infrastructure leh services cess atan a ni a, Rs 2 dang chu road maintenance atan a ni. Tuna tuialhthei man tihsan hi kum 2021-a tuialhthei man aiin a la hniam zawk niin a sawi bawk.
Kum 2021-a tuialhthei man a san khan tihhniam phutin hetianga hmalakna hi MCVU lam hian an nei lo niin a lang a. Taxation minister kamchhuak atanga zawhna lo awm thei ta chu, kum 2021-a tuialhthei man kha tuna tuialhthei man tihsan ai hian a la sang zawk cheu si a, MCVU lam hian engatinge tun ataka tuialhthei man tihhniam an phut nat tak em em mai le? tih zawhna a lo piang thei ta a ni.
Kawng a chhiat avanga lirthei an tlan that theih loh thu te pawh MCVU lam hian an thuchhuahah an tarlang a, chuti a nih chuan, kawngpui tha mamawh ngawih ngawite hian, petrol/diesel man atanga kawngpui siamna tur Rs 2 lo thawh ve chu an tha a na ta viau em ni? ti pawhin zawhna a siam theih bawk awm e.
Tuna MCVU hmalakna thlawp lotu commercial vehicle enkawltu pawl thenkhat an awm a, mipui harsatna siam zawnga thiltih hi tha kan ti ve lo, an ti a. Hengho hian tuialhthei man a san avang hian lirthei hman man tihsan an tum hran lo turah a ngaih theih ang a. Chuti a nih chuan, tuialhthei man tihsanna hian lirtheia eizawngtute hi chuti takin a nghawng buai lo tihna a ni thei awm e.
Hetih rual hian, sawrkarin tuialhthei man a tihpunna chhan pakhat kawngpui siam nana Rs 2 hi a nihna tur angin hman a ni chiah em tih hi mipui lam pawhin kan thlithlai ve ran a pawimawh awm e, abikin lirtheia eizawngtute phei chuan enthla ngun bik lehzual nghe nghe se a tha ang.
Lirtheia eizawngtute hian an eizawnna kawngah thahnem an ngaihna hi mipui lam chuan an hriatthiampui vek ang, mahse mipui harsatna siam zawnga hmalakna an kalpui erawh hriatthiam a har deuh awm e; mipui rawngbawltu an nihna zawn hi buknaah khai tel ve thin se a duhawm hle a ni.
Tlak inhuam party sawrkar hian kum khat pawh sawrkarna a la kalpui hma hian han rik deuh rap rapna tur a tawng chho ta zut mai a, khaw êng hnuaiah ringawt hian ram siamthatna hna hi a thawh reng theih bik lo a, khawdur pawh hmachhawn a ngai a ni tih an vawn reng a pawimawh ang.