Sawrkar nena YMA thawhdunna

PHE department leh Central YMA chuan kum hnih dang thawk dun leh turin tun hnai khan thu an thlung a. An thawh dun tur chu —Kan rama tuihna humhalh leh a awmsa tihpun; kan rama faina leh fai duhna thinlung nena changkanna lamtluang zawh, tih a ni.
Kan rama tuihna humhalh leh a awmsa tih pun thupuiah neiin kum 2012-2025 chhung thawh dunna hlawhtling tak hman a lo ni tawh a. Kum 2017-2025 chhung khan fai leh thianghlim inzirtirna chungchangah thawh dunna hlawhtling tak hman a ni.
PHE department bakah department thenkhatte nen pawh YMA hian thawhdunna thu thlungin ram leh hnam hmasawnna turin a thawh hlawk thin hle a. Sawrkar nena thawhdunna thuthlung siam kher lo pawhin, YMA hian ram leh hnam hmasawnna tur thilah chuan, thahnemngai takin a thawk mai thin. Hei hi Mizoram sawrkar thachakna hnar pawimawh tak pakhat a tling a tih theih bawk awm e.
YMA hi NGO (non-governmental organisation), ‘political rawng kai lo pawl’ tia sawi a ni a. ‘Political rawng kai lo’ tihin a kawh deuh ber chu, ram politic thila inhnamhnawih lo, sawrkar hnuaia law enforcement thilah te, policy-making thilah te inhnamhnawih lo, pawl member hamthatna (welfare) atana thawh te, humanitarian issue leh social issue hrang hranga a tul ang zela inhnamhnawiha ram leh hnam hmasawnna leh thatna tura thawk thin pawl, tihna a ni deuh ber awm e. A lehlamah chuan, YMA hi community-based organisation a ni ber awm e.
Tun hnaia Durtlang leh Zanlawn inkar kawngpui siam mek a chhiat lutuk avanga Central YMA Road Monitoring Committee inrawlhna ang chite kha sawrkar tihtur anga ngaih ni mah se, sawrkar chuan a tihtur a tih miau loh avangin, ram leh hnam hmasawnna tur leh ram leh hnam tana tha tur a nih avangin YMA chuan hnathawktute ‘thawk tha turin’ ruahmanna a siampui a, social issue thilah a kaih luh theih awm e.
Ruihhlo do kawngah te, ramngaw humhalh kawngah te, kangmei ven kawngah te, tuihna humhalh leh tuihna tihpunna tura hmalakna kawngah te, lui sangha humhalh kawngah te, fai leh thianghlimna kawngah te, a tam mai, kan sawi seng lovang. YMA leh sawkar thawhdunna avanga Mizoramin hmasawnna hmel a hmuh mekte hi han belhchian chuan, YMA hi lo awm lo ta se, heng zawng zawng hi hmuh tur a awm dawn lo tihna a ni ang a, kan ram (state) la hnufual dan tur hi chhut ngam pawh a ni awm lo e.