Sawrkar ngaihthah nia inhria HISSLAM-in badge dum bel

Sawrkar ngaihthah nia inhria
HISSLAM-in badge dum bel
Sawrkar hnuaia higher secondary school zirtirtute chuan chhan hrang hrang vangin ngaihthah bik nia an inhriat avang leh thuneitute laka an thil phut tih hlawhtlinna atan an hnathawhnaah badge dum an bel mek.
Higher Secondary School Lecturers Association of Mizoram (HISSLAM) hian chhan pali ah lungawilohna leh thil phut an nei a. Kum 1997 hnu ah an tan direct recruitment neih a ni ta loa, hei hian zirtirtu indaihloh bakah zirnaah a tha lo zawngin nghawng a nei chho zel a, thuneitute hnenah vawi tam an thlen hnu pawhin hmalakna tak tak a awm thei loa, post ruak an neih hi regular-a hnawhkhah thuai tul an tih thu an sawi.
HSS hnuaia contract lecturer-te chu hun rei tak thawk tawh, he hna laknaah pawh MPSC kaltlanga interview/ examination hmanga dan tlawhchhana lak an nih laiin, an nghehna tur dan ‘The Mizoram Regularisation of Contract Employees Scheme 2008’ chu ‘100 point reservation roster for regularisation of employees engaged on contract basis, provisional employees and work-charged employees’ in a rawn luahlan tih an sawi.
‘He 100-point roster hi School Education department hnuaia higher secondary school, 1997 hnulama direct recruitment vawikhat mah nei tawh lote tan a tha lo em em a. Direct recruitment nei nasa department dang leh hna lak dan inanglo (nature of recruitment) tak tak nen min hrutrual vek mai hi pawi kan ti a, min ngaihtuah sak tur leh HSS-a contract-a thawk mekte pawh, an luh tirha dan hman anga ngaihtuah sak tura vawi duai lo kan thlen hnua hmasawnna kan hmu thei miah lo hi HSS zirna ngaihthahnaah kan ngai,’ an ti.
School timing, uniform policy leh academic calendar chu education professional leh academician-ten department chhungah Board emaw Committee emaw dina uluk taka ruahman tur chi nia an ngaih laiin, public opinion /poll hmanga zirna in leh thawktute chungchang chai a ni ta mai chu zirna leh thawktute tan thil tha ber a ni ah an ngai lo tih an sawi a ni.
‘2024 August atang khan HSS zirtirtuten transfer notification tum 5 kan hmu tawh a, a dawngtu tak turtea a thlen hma in social media-a hmuh hmasak a ni ta fo mai hi tha lo kan ti a. Hetianga mass transfer leh hemi boruak avang hian kum khat tehmeuh HSS zirtirtute hi rilru nghet pu thei lo leh chiai takin kan awm ta. Hemi chungchang min chinfel sak tur leh NEP 2020 behchhana transfer policy mumal leh langtlang min siamsak turin kan ngen a ni,’ HISSLAM hian ti.
Badge dum bel hi August 18 – 20 chhung an kalpui dawn tih an sawi a ni.